រាជធានីភ្នំពេញ ៖ បុរសជនជាតិកូរ៉េម្នាក់ សន្លប់បាត់ស្មារតី ខណ:កំពុងជិះម៉ូតូ ត្រូវរថយន្តបើកបុកគារបណ្តាលឲ្យដួលបោកក្បាលទៅនឹងថ្នល់រងរបួសធ្ងន់ បង្កការភ្ញាក់ផ្អើលនៅម៉ោង ១០និង៣៥នាទីព្រឹក ថ្ងៃទី២៨ ខែកក្កដា ឆ្នាំ២០២១នៅតាមបណ្តោយផ្លូវ៣០ម៉ែត្រ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។

តាមប្រភពព័ត៌មាននៅកន្លែងកើតហេតុ បានឲ្យក្រុមការងា TVFB ដឹងថា មុនពេលកើតហេតុ គេឃើញបុរសជនជាតិកូរ៉េម្នាក់ វ័យប្រហែល៦០ឆ្នាំ ជិះម៉ូតូម៉ាក Today ពណ៌ខ្មៅមួយគ្រឿង គ្មានផ្លាកលេខ ដឹកកន្ត្រកដែលមានឈើច្រត់សៀតនៅខាងក្រោយ ធ្វើដំណើរពីទិសដៅពីជើងទៅត្បូង ស្របពេលនោះក៏មានរថយន្តមួយគ្រឿងមិនចាំម៉ាកបើកបរស្របទិសគ្នាក្នុងល្បឿនយ៉ាងលឿន បានបុកគារជនរងគ្រោះដែលកំពុងតែជិះម៉ូតូបណ្តាលឲ្យដួលបោកក្បាលរងរបួសធ្ងន់ត្រូវបានបញ្ជូនតាមរថយន្តសាមុយរបស់មន្ទីរពេទ្យឯកជនសួគ៌ាដឹកយកទៅធ្វើការសង្រ្គោះភ្លាមៗផងដែរ។

ក្រោយពេលកើតហេតុ កម្លាំងសមត្ថកិច្ចនគរបាលប៉ុស្តិ៍ស្ទឹងមានជ័យទី៣ នៃអធិការដ្ឋាននគរបាលខណ្ឌមានជ័យចុះដល់កន្លែងកើតហេតុ និងយកកាបូបជនរងគ្រោះនិងម៉ូតូជនរងគ្រោះយកទៅរក្សាទុកនៅប៉ុស្តិ៍នគរបាលរដ្ឋបាលស្ទឹងមានជ័ទី៣ដើម្បីប្រគល់ជូនជនរងគ្រោះវិញនៅពេលក្រោយ៕មេសា