ខេត្តបន្ទាយមានជ័យ ៖ ជនសង្ស័យម្នាក់ ដែលជាប្តីបានយកកាំបិត ប៉ុនប៉ង គំរាមសម្លាប់ស្ត្រីជាប្រពន្ធ តែមិនបានសម្រេច ដោយសារមានប្រជាពលរដ្ឋ រស់នៅ ក្បែរ ខាងជួយចាប់ឃាត់ខ្លួន ប្រគល់ឲ្យនគរបាលស្រុកថ្មពួកទាន់ពេលវេលា កាលពីវេលាម៉ោង៥ និង ៣០ នាទី ថ្ងៃទី២៧ ខែកក្កដា ឆ្នាំ២០២១ នៅភូមិកសិណ ឃុំថ្មពួក ស្រុកថ្មពួក ខេត្តបន្ទាយមានជ័យ។
លោកវរសេនីយ៍ទោ ពេជ្រ ប៊ុនធឿន នាយការិយាល័យនគរបាលព្រហ្មទណ្ឌកម្រិតស្រាល បានឲ្យដឹងថា ជនសង្ស័យជាប្តីឈ្មោះ សឿន ច័ន្ទវិឈុន អាយុ ៣១ ឆ្នាំ នៅ ភូមិបឹងសុក្រម ឃុំគោករមៀត ស្រុកថ្មពួក ខេត្តបន្ទាយមានជ័យ។ ចំណែកប្រពន្ធអាយុ ៣០ ឆ្នាំ។
លោកបន្តឲ្យដឹងថា តាមការសួរនាំ ជនសង្ស័យជាប្តី បានសារភាពថា នៅថ្ងៃកើតហេតុ ខ្លួនបានផឹកស្រាស្រវឹង ហើយមានគេប្រាប់ថា ប្រពន្ធរបស់ខ្លួនមានគេប្រុង ស្តីដណ្តឹង ដែលធ្វើឲ្យខ្លួន មានកំហឹងគួបផ្សំនឹង ជាតិស្រាចូលពោះផង ក៏ជិះម៉ូតូកាន់កាំបិតប៉័ងតោ ពេលមកដល់ផ្ទះឃើញ នាងកំពុងដេកលើអង្រឹងក្រោមផ្ទះ ដោយ អំណាចប្រច័ណ្ឌផងមិនបានសួរនាំ អ្វីក៏ចាប់សក់ក្បាលគំរាមស្លាប់ចោល តែត្រូវបងប្អូន និងអ្នកជិតខាងឃើញក៏មកប្រតាយប្រតប់ចាប់ដក យក កាំបិត ចេញ និង រាយការណ៍ទៅសមត្ថកិច្ច ។
លោក បាន បន្តទៀតផងដែរ ថា ដោយផ្អែកលើចម្លើយ សារភាព និងសាក្សីនៅកន្លែងកើតហេតុ រួមទាំងមាន វត្ថុតាងជាក់ស្តែង ជនសង្ស័យត្រូវបានកម្លាំងនគរបាល ជំនាញ រៀបចំសំណុំរឿងបញ្ជូនទៅសាលាដំបូងខេត្តបន្ទាយមានជ័យ ដើម្បីចាត់ការបន្តតាមនីតិវិធីច្បាប់ ៕ អគ្គស្នងការដ្ឋាននគរបាលជាតិ
