រាជធានីភ្នំពេញ ៖ អ្នកឃើញហេតុការណ៍ព្រលឹងចុងសក់ ខណៈយុវជន២នាក់បងប្អូនបង្កើត ជិះម៉ូតូឌុបគ្នាឆ្លងផ្លូវ ស្របពេលរថយន្តហាយឡែនឌ័របើកបរដោយជនបរទេសម្នាក់ ក្នុងល្បឿនលឿន វ៉ាក់អើចាប់ហ្វ្រាំងមិនទាន់ បុកពេញទំហឹង កាលពីវេលាម៉ោង៤ និង២០នាទីល្ងាច ថ្ងៃទី២៨ ខែកក្កដា ឆ្នាំ២០២១ លើផ្លូវជាតិលេខ៣ មុខបន្ទាយទាហ៊ានង៧០ ក្នុងសង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មាននៅកន្លែងកើតហេតុ បានឲ្យដឹងថា ដំបូងឡើយ គេបានឃើញយុវជន២នាក់ ជិះម៉ូតូមួយគ្រឿងម៉ាក ហុងដាប៊ីត ពណ៌សលាយក្រហម បានឌុបគ្នាដោយយុវជន២នាក់បងប្អូនបង្កើតពីជើងទៅត្បូង លុះដល់ចំណុចកើតហេតុ បានបត់ឆ្លងតាមគន្លងផ្លូវពុះចែកជា២ ខណៈនោះក៏ត្រូវរថយន្តហាយឡែនឌ័រ ពណ៌ទឹកប្រាក់ ពាក់ផ្លាកលេខ ភ្នំពេញ 2AA-3221 បើកបរដោយបុរសជនបរទេសម្នាក់ស្របគ្នា ក្នុងល្បឿនលឿន ជាន់ហ្រ្វាំងមិនទាន់ បុកម៉ូតូយុវជនទាំង២នាក់ពេញទំហឹង បណ្តាលឲ្យប៉ើងខ្ទាតលើដំបូលរថយន្ត បោកប្រហែលជាង១០ម៉ែត្រ រងរបួសធ្ងន់ទាំង២នាក់ បាក់ភ្លៅ បែកក្បាល ត្រូវបានបញ្ជូនទៅកាន់មន្ទីរពេទ្យ។
ក្រោយពេលកើតហេតុ សមត្ថកិច្ចនគរបាលមូលដ្ឋានសហការជាមួយកម្លាំងជំនាញចរាចរណ៍ខណ្ឌ ចុះទៅវាស់វែងនិងយករថយន្តនិងម៉ូតូ ទៅរក្សាទុកនៅអធិការដ្ឋាននគរបាលខណ្ឌពោធិ៍សែនជ័យ ដើម្បីធ្វើការដោះស្រាយគ្នា នៅពេលក្រោយតាមច្បាប់បន្តទៀត៕
