រាជធានីភ្នំពេញ ៖ បុរសម្នាក់បើកបររថយន្តម៉ាក Lexus 450h បុកខឿនបន្ដឡើងបុករបងផ្ទះប្រជាពលរដ្ឋ បណ្តាលឲ្យរងការខូចខាត កាលពីវេលាម៉ោង១១ ថ្ងៃទី២៩ ខែកក្កដា ឆ្នាំ២០២១ ក្នុងសង្កាត់ឬស្សីកេវ ខណ្ឌឬស្សីកែវ រាជធានីភ្នំពេញ។

តាមប្រភពព័ត៌មាននៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើញរថយន្ត ម៉ាក Lexus 450h មួយគ្រឿង ដែលពាក់ស្លាកលេខ ភ្នំពេញ 2AG-9878 បើកបរដោយបុរសម្នាក់ តាមបណ្ដោយផ្លូវជាតិលេខ ៥ ក្នុងទិសដៅពីជើងទៅត្បូង មកដល់ចំណុចស្តុបស្ពានបាឡេ បានរេចង្កូតជ្រុលទៅបុកឡើងខឿន រួចបន្តបុកនឹងរបងនឹងជញ្ជាំងផ្ទះរបស់ប្រជាពលរដ្ឋបណ្ដាលឲ្យរងការខូចខាតមួយចំហៀងផ្ទះ។ ចំណែកឯរថយន្ដវិញគឺរងការខូចខាតមួយកំណាត់ខាងមុខ ដាច់កង់ទៅមុខលែងរួច។

ក្រោយពេលកើតហេតុសមត្ថកិច្ចជំនាញចរាចរណ៍របស់អធិការនគរបាលខណ្ឌឫស្សីកែវ ចុះមកដល់ទីតាំងកើតហេតុ ដោយបានឲ្យភាគីទាំងសងខាងជជែកគ្នានិងដោះស្រាយគ្នាបញ្ចប់រឿង ៕