រាជធានីភ្នំពេញ ៖ ពិតជារន្ធត់ណាស់ បុរសម្នាក់ជិះម៉ូតូលឿន បានជ្រុលទៅបុកសត្វឆ្កែ បណ្តាលឲ្យបោកក្បាលស្លាប់ភ្លាមៗមួយរំពេច កាលពីវេលាម៉ោង ៧និង៣០នាទីយប់ ថ្ងៃទី១ ខែសីហា ឆ្នាំ២០២១ នៅលើផ្លូវជាតិលេខ០៣ ក្នុងភូមិទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ។

សមត្ថកិច្ចនគរបាលចរាចរណ៍ខណ្ឌដង្កោ បានប្រាប់ ក្រុមការងារ TVFB ឲ្យដឹងថា ករណីគ្រោះថ្នាក់ចរាចរណ៍នេះ បានកើតឡើងរវាង ម៉ូតូម៉ាក SUZUKI LET’S ពណ៌ស ពាក់ស្លាកលេខ កំពង់ឆ្នាំង 1J-8024 បើកបរដោយបុរសម្នាក់ ឈ្មោះ ម៉េន មក់ ភេទប្រុស អាយុ២២ឆ្នាំ មុខរបរ អ្នកបើកបរអេស្កាវ៉ាទ័រ មានទីលំនៅភូមិត្រពាំងផ្អាវ ឃុំព្រីងជ្រុំ ស្រុកជើងព្រៃ ខេត្តកំពង់ចាម ធ្វើដំណើរក្នុងទិសដៅពីជើងទៅត្បូង លុះមកដល់ចំណុចកើតហេតុខាងលើ ក៏ទៅបុកសត្វ(ឆ្កែ)មួយក្បាល កំពុងរត់ឆ្លងផ្លូវ បណ្តាលឲ្យដួលបោកស្លាប់នៅកន្លែងកើតហេតុតែម្តង ។

សមត្ថកិច្ចបានបន្តថា ចំណែកម៉ូតូគឺខូចខាតស្រាលប៉ុណ្ណោះ ហើយបន្ទាប់ពីកើតហេតុ សមត្ថកិច្ចក៏បានធ្វើការពិនិត្យ និងប្រគល់ម៉ូតូអោយក្រុមគ្រួសារយកត្រឡប់ទៅផ្ទះវិញ។ ចំណែកសពប្រគល់អោយក្រុមគ្រួសារយកទៅធ្វើបុណ្យតាមប្រពៃណី ។

ចំណែកមូលហេតុ សមត្ថកិច្ចបានឲ្យដឹងថា បណ្តាលមកពីភាគីម៉ូតូ បើកបរក្នុងល្បឿនលឿនខ្វះការប្រុងប្រយ័ត្ន ៕