ខេត្តកណ្តាល ៖ រថយន្តក្រឡុកស៊ីម៉ង់ត៍មួយគ្រឿង បើកលឿនវ៉ាជែង ក្នុងស្ថានភាពគ្រោះថ្នាក់ ជ្រុលចង្កូតវេកន្ទុយបុកម៉ូតូសង់ ដែលជិះម៉ូតូឌុបប្រពន្ធកូន បញ្ច្រាស់ទិសគ្នា ផ្លោងធ្លាក់ពីលើផ្លូវ របួសទាំង៣នាក់ ធ្ងន់ស្រាល ខណៈរថយន្តនោះ ក៏ក្រឡាប់ផ្ងារជើង អូសជាច្រើនម៉ែត្រច្រង៉ាង កាលពីវេលាម៉ោង ៩ និង៥នាទី ថ្ងៃទី២ ខែសីហា ឆ្នាំ២០២១ លើផ្លូវជាតិលេខ១ ចន្លោះគីឡូម៉ែត្រ៤៧-៤៨ ភូមិសំរោងក្អែរ ឃុំសំរោងធំ ស្រុកកៀនស្វាយ ខេត្តកណ្តាល។

សមត្ថកិច្ចបានឲ្យដឹងថា ករណីនេះ កើតឡើងរវាង រថយន្ត១គ្រឿង ម៉ាកHYUNDAI ពណ៌លឿង ប្រភេទក្រឡុកស៊ីម៉ង់ ពាក់ផ្លាកលេខ ភ្នំពេញ 5A-1227 បើកបរដោយឈ្មោះ ថា ឌីណា ភេទប្រុស អាយុ២៤ឆ្នាំ រស់នៅភូមិក្បាលជ្រោយ ឃុំកំពង់ភ្នំ ស្រុកលើកដែក ខេត្តកណ្តាល រត់គេចខ្លួន (មេការប្រាប់ឈ្មោះអ្នកបើករថយន្ត) បានដឹកបេតុងពីភ្នំពេញ ទៅអ្នកលឿង តាមផ្លូវជាតិលេខ១។

សមត្ថកិច្ចបន្តថា លុះដល់ចំណុចកើតហេតុ រថយន្តនេះ ក៏បានបើកជែងរថយន្តមួយគ្រឿងទៀតក្នុងស្ថានភាពគ្រោះថ្នាក់ បណ្តាលឲ្យវេកន្ទុយទៅបុកម៉ូតូម៉ាកហុងដាសេ១២៥ ពណ៌ខ្មៅ ពាក់ផ្លាកលេខ ព្រៃវែង1H-8300 បើកបរដោយឈ្មោះ ជួន ភេទប្រុស អាយុ២៥ឆ្នាំ និងឌុបប្រពន្ធឈ្មោះ វង្ស នាង អាយុ២៣ឆ្នាំ និងកូនអាយុ២ឆ្នាំ ក្នុងទិសដៅផ្ទុយគ្នា ធ្លាក់ពីលើផ្លូវចូលគុម្ពព្រៃ ។ ចំណែករថយន្ត ក្រឡាប់ផ្ងារជើងច្រង៉ាង ។

ក្រោយកើតហេតុ សមត្ថកិច្ចនគរបាលចរាចរណ៍មូលដ្ឋាន បានចុះមកធ្វើការវាស់វែងនិងបានបញ្ជូនជនរងគ្រោះទាំង៣នាក់ ទៅសង្គ្រោះព្យាយាមនៅមន្ទីរពេទ្យ ក្នុងរាជធានីភ្នំពេញ និងបានវាស់វែង យករថយន្តនិងម៉ូតូទៅរក្សាទុក រង់ចាំធ្វើការដោះស្រាយគ្នាតាមច្បាប់បន្តទៀត៕