ខេត្តកំពង់ស្ពឺ ៖ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា យ៉ាងហោចណាស់ បុរសម្នាក់បានស្លាប់យ៉ាងរន្ធត់ ខណៈមនុស្ស៣នាក់ទៀត បានរងរបួសធ្ងន់ ក្នុងករណីគ្រោះថ្នាក់ចរាចរណ៍ម៉ូតូបុកម៉ូតូ យ៉ាងពេញទំហឹង កាលពីវេលាម៉ោង ១និង៥៤នាទីរសៀល ថ្ងៃទី៣ ខែសីហា ឆ្នាំ២០២១ ចំណុចស្ពានដែក លើផ្លូវលំ ស្ថិតក្នុងភូមិពស់វែក ឃុំរស្មីសាមគ្គី ស្រុកឱរ៉ាល់ ខេត្តកំពង់ស្ពឺ ។

តាមប្រភពព័ត៌មានបានឲ្យដឹងថា មុនពេលកើតហេតុ មានម៉ូតូ០១គ្រឿង ម៉ាកអ៊ិចស៊ីទ័រ ផលិតឆ្នាំ២០២០ ពណ៌ខ្មៅ គ្មានផ្លាកលេខ (គ្មានមួក គ្មានកញ្ចក់) បើកបរដោយឈ្មោះស្រឿង ចាន់ទ្រា ភេទប្រុស អាយុ២៣ឆ្នាំ(របួសធ្ងន់) ស្នាក់នៅភូមិកាប់ទូក ឃុំព្រៃរំដួល ស្រុកភ្នំស្រួច ខេត្តកំពង់ស្ពឺ បើកបរម៉ូតូក្នុងទិសដៅពីត្បូងទៅជើង លុះដល់ចំណុចកើតហេតុ ស្រាប់តែរេចង្កូតចូលចំណែកផ្លូវម្ខាង ទៅបុកម៉ូតូ០១គ្រឿង ម៉ាកវ៉េវអាល់ហ្វា ផលិតឆ្នាំ២០១៨ ពណ៌ខ្មៅ គ្មានផ្លាកលេខ (គ្មានមួក គ្មានកញ្ចក់) បើកបរដោយឈ្មោះរស់ រីម ភេទប្រុស អាយុ៥០ឆ្នាំ (ស្លាប់នៅកន្លែងកើតហេតុ) ខណៈដែលដឹកប្រពន្ធឈ្មោះ ហ៊ុន ង៉ែត ភេទស្រី អាយុ៥៣ឆ្នាំ របួសធ្ងន់ និងចៅប្រុស ឈ្មោះរ៉ន យ៉ាងកូ អាយុ៤ឆ្នាំ ស្នាក់នៅភូមិពស់វែក ឃុំរស្មីសាមគ្គី ស្រុកឱរ៉ាល់ ខេត្តកំពង់ស្ពឺ របួសធ្ងន់ ទាំង០៣នាក់ ។

ក្រោយកើតហេតុ សមត្ថកិច្ច បានចុះត្រួតពិនិត្យវាស់វែងកន្លែងកើតហេតុ និងបានធ្វើកំណត់ហេតុប្រគល់សាកសពជូនទៅសាច់ញាតិយកទៅធ្វើបុណ្យតាមប្រពៃណី។ រីឯវត្ថុតាងទាំង០២ ត្រូវបានចាប់យកមករក្សាទុកនៅអធិការរដ្ឋាននគរបាលស្រុកឱរ៉ាល់ ដើម្បីរង់ចាំធ្វើការដោះស្រាយគ្នាពេលក្រោយតាមច្បាប់បន្តទៀត៕