រាជធានីភ្នំពេញ ៖ រថយន្តម៉ាកហ៊ីយ៉ាន់ដាយមួយគ្រឿង បើកបរខ្វះការប្រុងប្រយត្ន័ក្នុងល្បឿនលឿន បុកបុរសម្នាក់ កំពុងដើរឆ្លងផ្លូវ ពេញទំហឹងស្លាប់ភ្លាមៗនៅនឹងកន្លែងកើតហេតុ ចំណែករថយន្តបានជ្រុលចង្កូតធ្លាក់ពីលើផ្លូវ កាលពីវេលាម៉ោង ៩យប់ ថ្ងៃទី៣ ខែសីហា ឆ្នាំ២០២១ លើផ្លូវជាតិលេខ៣ មុខសួនវឌ្ឈន:២ ស្ថិតនៅក្នុងភូមិ ទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ។

សមត្ថកិច្ចបានឲ្យដឹងថា សាកសពជនរងគ្រោះដែលស្លាប់ មិនទាន់ស្គាល់ពីអត្តសញ្ញាណនៅឡើយនោះទេ ។

ប្រភពដដែលបន្តថា ករណីនេះ កើតឡើង រវាងរថយន្តម៉ាកហ៊ីយ៉ាន់ដាយ មួយគ្រឿង ពាក់ស្លាកលេខ ភ្នំពេញ 3E-2946 អ្នកបើកបរពុំស្គាល់ឈ្មោះពុំស្គាល់អត្តសញ្ញាណ (រត់គេចខ្លួនបាត់ ពីកន្លែងកើតហេតុ) ក្នុងទិសដៅពីត្បូងទៅជើង លុះមកដល់ចំណុចកើតហេតុ រថយន្តនោះ ក៏បានបើកបុកអ្នកថ្មើរជើង ដែលឆ្លងផ្លូវ ពីលិចទៅកើត បណ្តាលឲ្យស្លាប់ ភ្លាមៗតែម្តង។

ក្រោយកើតហេតុសមត្ថកិច្ចបានធ្វើការវាស់វែង យករថយន្តទៅរក្សាទុកនៅការិយាលយ័ចរាចរណ៍ផ្លូវគោក រង់ចាំស្រាវជ្រាវរកម្ចាស់ មកដោះស្រាយគ្នាតាមច្បាប់ ។ ចំណែកសាកសពជនរងគ្រោះ ត្រូវបានសមត្ថកិច្ចយកទៅតម្កល់នៅវត្ត រង់ចាំស្រាវជ្រាវរកសាច់ញាតិ បន្តទៀត៕