រាជធានីភ្នំពេញ ៖ ស្ត្រីម្នាក់ បានស្លាប់ភ្លាមៗមួយរំពេច ខណៈទាញទ្វាររបងបើក បែរជារលំសង្កត់ពីលើពេញទំហឹង តែម្តង កាលពីវេលាម៉ោង ១២ និង៣៥នាទី ថ្ងៃត្រង់ទី៣ ខែសីហា ឆ្នាំ២០២១ នៅចំណុចភូមិកប់ភ្លុក សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ។
ប្រភពព័ត៌មានបានឲ្យដឹងថា ស្ត្រីដែលត្រូវបាន ទ្វាររបងរលំសង្កត់ស្លាប់នេះ មានឈ្មោះ ជួង ស៊ុម ភេទស្រី អាយុ៤៦ឆ្នាំ មុខរបរមេផ្ទះ ។
ប្រភពព័ត៌មានដដែលបានឲ្យដឹងថា មុនពេលកើតហេតុ គេបានឃើញស្ត្រីរងគ្រោះ បានមកទាញទ្វាររបងបើក និងសារ៉េទ្វារឲ្យបានត្រឹមត្រូវ ស្រាប់តែទាញទ្វារដែកនោះ ផុតពីគន្លឹះទ្វារ ក៏បណ្តាលឲ្យរលំសង្កត់ពីលើទាំងកំរោល លាន់ដូរគ្រាំង ស្លាប់ភ្លាមៗតែម្តង ផ្អើលដល់បងប្អូនប្រជាពលរដ្ឋ ដែលនៅក្បែរនោះ បានឃើញជួយទាញជនរងគ្រោះ ចេញពីខាងក្រោមទ្វារ តែទោះបីជាយ៉ាងណា គាត់ស្លាប់បាត់ទៅហើយ។
ក្រោយកើតហេតុ ក៏មានវត្តមាន របស់សមត្ថកិច្ចនគរបាលមូលដ្ឋាន ចុះទៅដល់ធ្វើការពិនិត្យ និងប្រគល់សពឲ្យក្រុមគ្រួសារធ្វើបុណ្យតាមប្រពៃណី។
ករណីនេះ ក៏ជាសារមួយ ជូនដល់បងប្អូនប្រជាពលរដ្ឋទាំងអស់ ដែលប្រើប្រាស់ទ្វារដែកប្រភេទនេះ សូមបង្គើនការប្រុងប្រយត្ន័ឲ្យបានខ្ពស់ ព្រោះហេតុការណ៍រលំទ្វារសង្កត់បែបនេះ មិនមែនទើបតែកើតមានឡើង លើកទី១នោះទេ ពោលគឺកើតឡើងជាញឹកញាប់ ដោយខ្វះត្រូវបាត់បង់កូនជាទីស្រឡាញ់ដែលនៅតូចៗ ខណៈអ្នកផ្សេងទៀតក៏បានបាត់បង់សាច់ញាតិក្រុមគ្រួសារផងដែរ ៕
