ខេត្តកំពង់ឆ្នាំង ៖ បុរសម្នាក់បានស្លាប់នៅកន្លែងកើតហេតុ ក្នុងគ្រោះថ្នាក់ចរាចរណ៍រវាងរថយន្តក្រុមហ៊ុនដឹកជញ្ជូនរបស់ក្រុមហ៊ុន រស្មីបូព៌ាបុកជាមួយម៉ូតូ កាលពីវេលាម៉ោង ៥ និង៤៥នាទី ថ្ងៃទី១៩ ខែមីនា ឆ្នាំ២០២១ លើកំណាត់ផ្លូវជាតិលេខ០៥ ចន្លោះគីឡូម៉ែត្រលេខ៤៤-៤៥ ក្នុងភូមិចំការស្វាយ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង ។
សមត្ថកិច្ចបានឲ្យដឹងថា រថយន្តម៉ាក KIA ពណ៌ទឹកមាស ពាក់ស្លាកលេខ ភ្នំពេញ 3D-7541 អ្នកបើកបរមិនស្គាល់ឈ្មោះ និងអត្តសញ្ញាណ (ជារថយន្តក្រុមហ៊ុនដឹកជញ្ជូន រស្មីបូព៌ា) បានធ្វើដំណើរក្នុងទិសខាងជើងទៅទិសខាងត្បូង ។ លុះមកដល់ចំណុចកើតហេតុ បានបុកម៉ូតូ១គឿងម៉ាក HONDA C100 ពណ៌ក្រហម ពាក់ស្លាកលេខ ក4149-ប ផ1 បើកបរដោយឈ្មោះ សុខ យ៉ាន ភេទប្រុស អាយុ៦៦ឆ្នាំ មានទីលំនៅភូមិស្តុក ឃុំភ្នំបាត ស្រុកពញាឮ ខេត្តកណ្តាល ក្នុងដំណើរច្រាសទិសគ្នា បណ្តាលអោយស្លាប់នៅកន្លែងកើតហេតុ ។
បន្ទាប់ពីកើតហេតុ កម្លាំងជំនាញបានចុះធ្វើការវាស់វែង និង នាំយកមធ្យោបាយទាំង២គ្រឿងមករក្សាទុក្ខនៅប៉ុសិ៍្តនគរបាលរដ្ឋបាលសេដ្ឋី ដើម្បីកសាងសំណុំរឿងចាត់ការទៅតាមនីតិវិធីច្បាប់ ។ ចំណែកសាកសពជនរងគ្រោះប្រគល់ជូនក្រុមគ្រួសារចាត់ ចែងធ្វើបុណ្យបានប្រពៃណី ៕ ប្រភព៖ អគ្គស្នងការដ្ឋាននគរបាលជាតិ
