ខេត្តបន្ទាយមានជ័យ ៖ យោងតាមផេក មូលដ្ឋានកងរាជអាវុធហត្ថ ក្រុងសិរីសោភ័ណ បានឲ្យដឹងថា ជនសង្ស័យចំនួន៤នាក់ ត្រូវបានកម្លាំងកងរាជអាវុធហត្ថក្រុងសិរីសោភ័ណ ធ្វើការចាប់ឃាត់ខ្លួន ក្រោយនាំបក្ខពួក ដេញកាប់ទៅឲ្យយុវជនម្នាក់ បណ្តាលឲ្យរបួសធ្ងន់ នៅថ្ងៃទី៣១ ខែកក្កដា ឆ្នាំ២០២១ ។

ជនសង្ស័យទាំង៤នាក់ រួមមាន៖

១/.ឈ្មោះ វុត តុលា (ហៅអាតុ) ភេទប្រុស អាយុ១៦ឆ្នាំ បច្ចុប្បន្នរស់នៅភូមិព្រហូត សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ

២/.ឈ្មោះ វិន តុងហួរ ភេទប្រុស អាយុ១៧ឆ្នាំ បច្ចុប្បន្នរស់នៅភូមិរោងម៉ាស៊ីន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ

៣/.ឈ្មោះ ឡឹម សុធារ៉ា ភេទប្រុស អាយុ១៧ឆ្នាំ

៤/.ឈ្មោះ សុខ វិសាល ភេទប្រុស អាយុ១៥ឆ្នាំ អ្នកទាំង០២ រស់នៅភូមិ/សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ។

សមត្ថកិច្ចបានឲ្យដឹងថា ការចាប់ឃាត់ខ្លួននេះ ធ្វើឡើងក្រោយមានពាក្យបណ្តឹងរបស់ឈ្មោះ ចាន់ ភិត ភេទស្រី អាយុ៣៧ឆ្នាំ រស់នៅភូមិ១ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ដែលបានរៀបរាប់ថា នៅថ្ងៃទី៣១ ខែកក្កដា ឆ្នាំ២០២១ កូនប្រុសរបស់គាត់ឈ្មោះ ចិន តើ បានសុំទៅលេងផ្ទះមិត្តភក្តិរបស់គេ ម្ដាយក៏យល់ព្រម លុះថ្ងៃទី០១ ខែសីហា ឆ្នាំ២០២១ មិត្តភក្តិកូនប្រុសរបស់គាត់បានទូរស័ព្ទមកប្រាប់ថា កូនគាត់ត្រូវបានក្មេងស្ទាវ០១ក្រុមដេញកាប់ បណ្ដាលឲ្យរងរបួសដៃខាងស្ដាំ ហើយកំពុងសម្រាកព្យាបាលនៅមន្ទីរពេទ្យមិត្តភាពកម្ពុជា-ជប៉ុន មង្គលបូរី ទើបរួសរាន់ទៅមើលកូននៅឯមន្ទីរពេទ្យ។ រហូតដល់ថ្ងៃទី២ ខែសីហា ទើបខ្លួនមកដាក់ពាក្យបណ្ដឹងនៅមូលដ្ឋានកងរាជអាវុធហត្ថក្រុងសិរីសោភ័ណតែម្ដង ។

ក្រោយទទួលបានពាក្យបណ្ដឹងភា្លម សមត្ថកិច្ចកងរាជអាវុធហត្ថ ធ្វើការស្រាវជ្រាវចាប់ឃាត់ខ្លួន បានជនសង្ស័យ៤នាក់ នៅវេលាម៉ោង១២និង៣០នាទី ថ្ងៃទី០៣ ខែសីហា ឆ្នាំ២០២១ នៅចំណុចបន្ទប់ជួល ភូមិ/សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ និងដកហូតកាំបិតប៉័ងតោចំនួន០២ដើម និងឧបករណ៍សម្រាប់ប្រើប្រាស់គ្រឿងញៀនមួយចំនួន ហើយបញ្ជូនមកមូលដ្ឋានកងរាជអាវុធហត្ថក្រុង ដើម្បីសួរនាំអំពីរឿងហេតុដែលកើតឡើង ព្រមទាំងធ្វើតេស្តទឹកនោមដើម្បីរកសារធាតុញៀនឃើញ វិជ្ជមានទាំងអស់ ។

ជនសង្ស័យទាំង០៤នាក់ បានឆ្លើយសារភាពថា ខ្លួនទាំង០៤នាក់ ពិតជាបានប្រើហិង្សាទៅលើជនរងគ្រោះឈ្មោះ ចិន តើ បណ្ដាលឲ្យរបួសដោយ រយះដៃខាងស្ដាំពិតប្រាកដមែន ហើយពួកគេក៏បានប្រើប្រាស់គ្រឿងញៀនជារៀងរាល់ថ្ងៃផងដែរ ។

បច្ចុប្បន្នជនសង្ស័យទាំង០៤នាក់ រួមនិងវត្ថុតាង ត្រូវបានកម្លាំងជំនាញមូលដ្ឋាន កងរាជអាវុធហត្ថក្រុងសិរីសោភ័ណ កសាងសំណុំរឿងបញ្ជូនមកបញ្ជាការដ្ឋានកងរាជអាវុធហត្ថខេត្តចាត់ការបន្តតាមច្បាប់៕