រាជធានីភ្នំពេញ ៖ មានការភ្ញាក់ផ្អើលទាំងយប់ ខណៈបងប្អូនប្រជាពលរដ្ឋ និងម្ចាស់រថយន្តដេញចាប់បានជនសង្ស័យ២នាក់ ដែលជិះម៉ូតូមួយគ្រឿង ឌុបគ្នាមកធ្វើសកម្មភាព លួចឆ្កឹះទ្វាររថយន្តរបស់ប្រជាពលរដ្ឋ ចំថ្ងៃស៊យត្រូវម្ចាស់គេទាន់ ស្រែកផ្អើលឆោឡោ ដេញចាប់បានម្នាក់ ខណៈម្នាក់ទៀតរត់បាត់ កាលពីវេលាម៉ោង ២និង៣០នាទី យប់ឈានចូលថ្ងៃទី៧ ខែសីហា ឆ្នាំ២០២១ តាមផ្លូវ១៩៨៦ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។

សមត្ថកិច្ចបានឲ្យដឹងថា ជនសង្ស័យដែលឃាត់ខ្លួនបាននេះ មានឈ្មោះ ទូច ចយ ភេទប្រុស អាយុ៣១ ឆ្នាំ មុខរបរធ្វើការនៅក្រុមហ៊ុនលក់ទឹកបរិសុទ្ធ ស្នាក់នៅបន្ទប់ជួល ម្តុំពោធិ៍ចិនតុង ខណ្ឌពោធិ៍សែនជ័យ។

ក្នុងនោះ បើតាមប្រភពព័ត៌មានពីម្ចាស់រថយន្តបានឲ្យដឹងថា គាត់បានទុករថយន្តម៉ាក Morning ពណ៌ទឹកក្រូច ពាក់ផ្លាកលេខ ភ្នំពេញ 2BG-0239 នៅខាងមុខផ្ទះ ហើយក៏ចូលទៅក្នុងផ្ទះ លុះក្រោយមក ក៏មានប្រជាពលរដ្ឋតេមកប្រាប់គាត់ថា ឃើញជនសង្ស័យ២នាក់ ជិះម៉ូតូធំមួយគ្រឿង គ្មានផ្លាកលេខ កំពុងឆ្កឹះទ្វារថយន្តរបស់គាត់ ក៏ប្រញាប់រត់ចេញពីក្នុងផ្ទះស្រែកចោរៗ ធ្វើឲ្យពួកគេភ័យជិះម៉ូតូរត់ ទើបម្ចាស់រថយន្តនិងប្រជាពលរដ្ឋ នាំគ្នាជិះដេញតាមពីក្រោយ ចាប់ខ្លួនបានម្នាក់ភ្លាមៗ ប្រគល់ឲ្យសមត្ថកិច្ច និងម្នាក់ទៀតរត់គេចខ្លួនបាត់ ។

បន្ទាប់ពីកើតហេតុជនរងគ្រោះក៏បានទៅដាក់ពាក្យបណ្តឹងនៅប៉ុស្តិ៍ភ្នំពេញថ្មី ដើម្បីឲ្យសមត្ថកិច្ចកសាងសំណុំរឿងចាត់ការតាមច្បាប់បន្តទៀត ៕