wរាជធានីភ្នំពេញ ៖ រថយន្តកូរ៉េដឹកសម្ភារៈគ្រឿងសំណង់មួយគ្រឿង បានរអិលធ្លាក់ចូលទឹកស្រះ សង្ស័យថាអ្នកបើកបរងងុយដេក ហើយបួងចង្កូតគេចពីរថយន្តគេផ្សេងទៀតនៅខាងមុខ សំណាងគ្មានអ្នករងរបួសនោះទេ បង្កឱ្យមានការភ្ញាក់ផ្អើលកាលពីវេលាម៉ោង១១ និង ៤០នាទីព្រឹកថ្ងៃទី ១០ ខែវិច្ឆិការ ឆ្នាំ ២០២១ នៅផ្លូវបេតុង ភូមិរលួស សង្កាត់រលួស ខណ្ឌដង្កោ។

ប្រភពព័ត៌មាននៅកន្លែងកើតហេតុបានប្រាប់ឲ្យដឹងថា មុនពេលកើតហេតុគេឃើញបុរសម្នាក់បើករថយន្តម៉ាកកូរ៉េ ពណ៌ស ពាក់ស្លាកលេខ ភ្នំពេញ 3F-2319 ធ្វើដំណើរតាមផ្លូវបេតុង ក្នុងទិសដៅពីជើងទៅត្បូងស្រាប់តែមកដល់ចំណុចកើតហេតុបានបើកគេចរថយន្តមកពីខាងមុខក៏រេចង្កូតមកខាងស្ដាំនិងរអិលធ្លាក់ចូលទឹកស្រះតែម្ដង ។ ភ្លាមនោះអ្នកបើកបររថយន្ត បានបើកទ្វារហើយរត់គេចខ្លួនបាត់ស្រមោល បន្សល់ទុករថយន្តនៅក្នុងទឹកស្រះរួមនិងសម្ភារៈគ្រឿងសំណង់ដែលធ្លាក់ចូលស្រះទឹក ។

ក្រោយពេលកើតហេតុសមត្ថកិច្ចប៉ុស្តិ៍នគរបាលរដ្ឋបាលរលួស បានចុះមកដល់ទីតាំងកន្លែងកើតហេតុ និងបានពិនិត្យទៅលើរថយន្តបង្កដោយឃើញថារថយន្តមិនបានបង្កគ្រោះថ្នាក់ដល់អ្នកដទៃ ទើបសមត្ថកិច្ចអនុញ្ញាតអោយខាងតំណាងរថយន្តហៅរថយន្តស្ទូចមកស្ទូចយករថយន្តបង្កយកទៅជួសជុលឡើងវិញ៕ មេសា