រាជធានីភ្នំពេញ ៖ បុរសជាជាងផ្សារដែកម្នាក់ បានឡើងទៅផ្សារស្លាកយីហោឆ្លងចរន្តអគ្គិសនីឆក់ធ្លាក់ពីលើរន្ទា បណ្តាលឲ្យរងរបួសធ្ងន់ធ្ងរ បង្កឲ្យមានការភ្ញាក់ផ្អើលទៅដល់បងប្អូនប្រជាពលរដ្ឋ កាលពីវេលាម៉ោង៤និង៣៥នាទីល្ងាច ថ្ងៃទី១០ ខែវិច្ឆិកា ឆ្នាំ២០២១ នៅតាមបណ្តោយផ្លូវ៣៧១ សឡា ភូមិទ្រា៣ សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។
សមត្ថកិច្ចបានឲ្យដឹងថា ជនរងគ្រោះខាងលើមានឈ្មោះ ជាង វិត អាយុ៣០ឆ្នាំ មុខរបរជាងដែក ស្នាក់នៅសង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ។
ប្រភពព័ត៍មាននៅកន្លែងកើតហេតុបានឲ្យដឹងថា មុនពេលកើតហេតុគេបានឃើញមានជាងដែកមួយក្រុម បានបើកម៉ូតូសណ្តោងរ៉ីម៉កដឹកដែកមួយគ្រឿង ដឹកគ្នាមកផ្សារដែកនៅមុខផ្ទះល្វែងខាងលើ ជាប់នឹងក្លោងទ្វារអាគារហុកអាន ដោយជនរងគ្រោះបានឡើងលើរន្ទាដែកនៅខាងលើ ខណៈដែលកំពុងទាញដែក ដើម្បីយកមកផ្សារ ស្រាប់តែប៉ះជាមួយខ្សែរកាបស្រាត ដែលនៅខាងលើ ក៏បណ្តាលឲ្យផ្ទុះឆក់ធ្លាក់មកខាងក្រោម បណ្តាលឲ្យរងរបួសយ៉ាងធ្ងន់ធ្ងរ ត្រូវក្រុមជាងដែលធ្វើការជាមួយគ្នា ដឹកតាមម៉ូតូកង់បីទៅកាន់មន្ទីរពេទ្យរុស្ស៊ី ដើម្បីឲ្យក្រុមគ្រូពេទ្យជួយសង្រ្គោះដល់អាយុជីវិត។
ក្រោយពេលកើតហេតុ កម្លាំងសមត្ថកិច្ចមូលដ្ឋាននៃប៉ុស្តិ៍រដ្ឋបាលសង្កាត់ស្ទឹងមានជ័យទី១ បានចុះទៅដល់ទីតាំងកន្លែងកើតហេតុ និងបានធ្វើកំណត់ហេតុជុំវិញទីតាំងខាងលើផងដែរ រីឯជនរងគ្រោះត្រូវបានក្រុមផ្សារដែកគា្នគាត់ បានធ្វើការដឹកយកទៅសង្គ្រោះនៅឯមន្ទីរពេទ្យ៕ មេសា
