ខេត្តព្រះសីហនុ ៖ បុរស៣នាក់ ជិះម៉ូតូ១គ្រឿង បញ្ច្រាសផ្លូវរង្វង់មូលតោពីរ ត្រូវរថយន្ដមួយគ្រឿងទៀត បើកស្របផ្លូវបុកពេញទំហឹង បណ្ដាលឲ្យបុរសម្នាក់ ក្នុងចំណោម៣នាក់ រងរបួសធ្ងន់ និងជ្រុះកាំភ្លើង២ដើម ផ្អើលប៉ូលិសព្រហ្មទណ្ឌកម្រិតស្រាល ឈរជើងនៅគោលដៅនោះជួយអន្តរាគមន៍ កាលពីវេលាម៉ោង ០៣ទៀបភ្លឺ ឈានចូលថ្ងៃទី១១ ខែវិច្ឆិកា ឆ្នាំ២០២១ នៅចំណុចរង្វង់មូលតោពីរ ស្ថិតក្នុងសង្កាត់លេខ៤ ក្រុង/ខេត្តព្រះសីហនុ។

ប្រភពព័ត៌មានពីប្រជាពលរដ្ឋ និងសមត្ថកិច្ចបានឲ្យដឹងថា ដំបូងឡើយគេបានឃើញម៉ូតូគ្រឿងម៉ាក HOMDA DREAM ពណ៌ខ្មៅ ពាក់ស្លាកលេខ ព្រះសីហនុ1J-4046 ជិះគ្នា៣នាក់ មកពីផ្លូវ៥០២ ហើយបានជិះបញ្ច្រាសរង្វង់មូលតោពីរ ខណៈដែលកំពុងតែធ្វើដំណើរ ភ្លាមៗនោះក៏មានរថយន្ដ១គ្រឿងទៀតម៉ាក

LAND CRUISE ពណ៌ស ពាក់ស្លាកលេខ ភ្នំពេញ2BM-3099 បើកចេញពីផ្លូវលេខ៣០០ ឡើងទៅរង្វង់មូលតោពីរស្របផ្លូវ ខណៈនោះដោយរថយន្ដវាក់អើជាមួយនិងម៉ូតូ ជាន់ហ្វ្រាំងមិនទាន់ ជ្រុលទៅបុកម៉ូតូទាំងកំរោល បណ្ដាលឲ្យបុរសម្នាក់ ក្នុងចំណោមគ្នា៣នាក់ រងរបួសធ្ងន់ ត្រូវបានបញ្ជូនទៅមន្ទីពេទ្យ ហើយភ្លាមៗរថយន្ដបានបន្តបើករត់ តែត្រូវបានប្រជាពលរដ្ឋដេញឃាត់បាន និងឲ្យត្រឡប់មកកន្លែងកើតហេតុវិញ។

សូមបញ្ចាក់ផងដែរថា បន្ទាប់ពីមានករណីគ្រោះថ្នាក់ចរាចរណ៍នេះ ភាគីម៉ូតូបានជ្រុះកាំភ្លើងចំនួន២ដើមផងដែរ ហើយបើតាមការបញ្ចាក់បន្ថែមពីសមត្ថកិច្ចបានឲ្យ TVFB ដឹងទៀតថា បុរស ទាំង៣នាក់នោះមាន២នាក់ជា ( អង្គរក្ស ) ។

ក្រោយកើតហេតុ សមត្ថកិច្ចជំនាញចរាចរណ៍ បានចុះមកនិងធ្វើការវាស់វែងយករថយន្ដរួមទាំងម៉ូតូទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តព្រះសីហនុ រងចាំភាគីទាំងសងខាងចូលខ្លួនមកដោះស្រាយគ្នានៅពេលក្រោយ៕ សំណាង