ខេត្តតាកែវ ៖ ដើម្បីទប់ស្កាត់ការចរាចរណ៍ទំនិញខូចគុណភាពនិងហួសកាលបរិច្ឆេទប្រើប្រាស់ ធានាឱ្យការធ្វើធុរកិច្ចដោយសុចរិតនៅលើទីផ្សា រ ធានាសុខុមាលភាពជូនប្រជាពលរដ្ឋ និងការពារផលប្រយោជន៍ជូនអ្នកប្រើប្រាស់ នៅថ្ងៃទី១០ ខែវិច្ឆិកា ឆ្នាំ២០២១ មន្រ្តីស៊ើបអង្កេតសាខា ក.ប.ប. ខេត្តកំពង់ធំ និងខេត្តតាកែវ បានបន្តចុះត្រួតពិនិត្យទំនិញគ្រប់ប្រភេទនៅលើទីផ្សារក្នុងស្រុកកំពង់ស្វាយនៃខេត្តកំពង់ធំ និងស្រុកត្រាំកក់នៃខេត្តតាកែវ។ នេះបើយយោងតាមផេក អគ្គ.ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ CCF ។

ការចុះត្រួតពិនិត្យនេះដែរ មន្រ្តីជំនាញបានរកឃើញនូវទំនិញចម្រុះដែលខូចគុណភាពនិងហួសកាលបរិច្ឆេទប្រើប្រាស់ចំនួន ២០៤.៨៤ គីឡូក្រាម។

ក្នុងនោះ មន្រ្តីជំនាញក៏បានធ្វើការដកហូតទំនិញទាំងនោះមករក្សាទុកដើម្បីធ្វើការកម្ទេចចោលនៅពេលក្រោយ និងបានធ្វើការពិន័យអន្តរការណ៍ទៅតាមនីតិវិធីច្បាប់ផងដែរ ៕