រាជធានីភ្នំពេញ ៖ ជនសង្ស័យម្នាក់ឃើញ ម៉ាញ៉េតូជាប់នឹងម៉ូតូគេទំនង ធ្វើសកម្មភាពលួចបានសម្រេច ហើយព្យាយាមរត់គេច ត្រូវបានម្ចាស់ម៉ូតូគេឃើញទាន់ ដេញចាប់បានមកវិញផ្អើលបងប្អូនប្រជាពលរដ្ឋពេញផ្លូវ កាលពីវេលាម៉ោង១និង៥០នាទីរសៀល ថ្ងៃទី១២ ខែវិច្ឆិកា ឆ្នាំ២០២១ នៅផ្លូវបេតុងទ្រុងមាន់ ភូមិទ្រា៤ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។

សមត្ថកិច្ចបានឲ្យដឹងថាជនរងគ្រោះមានឈ្មោះ ឆាយ វណ្ណៈ ភេទប្រុស អាយុ២៩ឆ្នាំ មុខរបរជាងជួសជុលម៉ូតូ និងលក់បាយ ស្នាក់នៅចំណុចកើតហេតុខាងលើ។ ចំណែកជនសង្ស័យមានឈ្មោះ សា វុធ អាយុ២២ឆ្នាំ មុខរបរមិនពិតប្រាកដ ។

ប្រភពព័ត៌មានពីជនរងគ្រោះ បានបញ្ជាក់ប្រាក់ក្រុមការងារTVFB ឲ្យដឹងថា មុនពេលកើតហេតុ រូបគាត់បានទុកម៉ូតូរបស់គាត់ នៅមុខផ្ទះ ហើយរវល់ជួសជុលម៉ូតូឲ្យភ្ញៀវ ស្រាប់តែលេចមុខជនសង្ស័យម្នាក់ ដើរមកក្បែរម៉ូតូរបស់គាត់ រួចធ្វើសកម្មភាពលូកដៃខ្វះយកម៉ាញ៉េតូ ដែលនៅជាប់នឹងម៉ូតូរបស់គាត់ ទើបម្ចាស់ម៉ូតូ ស្រែកឆោឡោ បង្កឲ្យមានការភ្ញាក់ផ្អើល ធ្វើឲ្យជនសង្ស័យភ័យស្លន់ស្លោពេក ព្យាយាមរត់គេចខ្លួន រហូតដល់ផ្សារទំនើប SUPER STORE ក្នុងភូមិសាស្ត្រសង្កាត់អូរបែកក្អម ខណ្ឌសែនសុខ ទើបម្ចាស់ម៉ូតូ និងអ្នកដំណើរចាប់ខ្លួនបានហើយប្រគល់ទៅឲ្យសមត្ថកិច្ចប៉ុស្តិ៍នគរបាលអូរបែកក្អម ដឹកយកមកធ្វើការសាកសួរបន្ត។

នៅចំពោះមុខសមត្ថកិច្ចជនសង្ស័យខាងលើបានសារភាពថា រូបគេពិតជាបានធ្វើសកម្មភាពលួចខ្វះយកម៉ាញ៉ាតូពីម៉ូតូរបស់ជនរងគ្រោះពិតប្រាកដមែន មូលហេតុ ដោយសារដាច់លុយទិញបាយហូប ។

បច្ចុប្បន្នជនសង្ស័យខាងលើ ត្រូវបានសមត្ថកិច្ចប៉ុស្តិ៍អូរបែកក្អមនៃអធិការដ្ឋាននគរបាលខណ្ឌសែនសុខ ប្រគល់ឲ្យទៅសមត្ថកិច្ចប៉ុស្តិ៍នគរបាលស្ទឹងមានជ័យទី៣ ចាត់ការបន្ត តាមនីតិវិធីច្បាប់៕ មេសា