រាជធានីភ្នំពេញ ៖ រថយន្តស៊េរីទំនើបម៉ាក Porches មួយគ្រឿង ពន្លះគ្នាជាមួយរថយន្ត PRIUS នៅកណ្តាលស្តុប B.K.C មុខប៉ុស្តិ៍នគរបាលស្រះចក តាមបណ្ដោយផ្លូវមុនីវង្ស កែងនឹងផ្លូវលេខ ១១០ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ បណ្តាលឲ្យរថយន្តទាំង២គ្រឿង រងការខូចខាតយ៉ាងដំណំ ផ្អើលសមត្ថកិច្ចចុះមកវាស់វែងទាំងយប់ នៅវេលាម៉ោង ១រំលងអាធ្រាត្រ ឈានចូលថ្ងៃទី ១៣ ខែវិច្ឆិកា ឆ្នាំ២០២១ នេះ ។

ប្រភពព័ត៌មានពីសមត្ថកិច្ចជំនាញចរាចរណ៍ របស់អធិការនគរបាលខណ្ឌដូនពេញ បានឲ្យដឹងថា មុនពេលកើតហេតុ គេឃើញរថយន្តស៊េរីទំនើបមួយគ្រឿងម៉ាក Porches មិនមានស្លាកលេខ បានធ្វើដំណើរតាមបណ្តោយផ្លូវភ្លោះ មកដល់ចំណុចកើតហេតុ ស្តុបផ្លូវបំបែកជា៤ មុខប៉ុស្តិ៍ស្រះចក ក៏បានបុកគ្នាជាមួយនឹងរថយន្តព្រូសមួយគ្រឿងទៀត ដែលពាក់ស្លាកលេខភ្នំពេញ 2AX-8859 បានបុកគ្នាពេញមួយទំហឹង បណ្ដាលឲ្យរថយន្តទាំង២គ្រឿង រងការខូចខាតទាំងដំណំ ។

ក្រោយកើតហេតុ សមត្ថកិច្ចជំនាញចរាចរណ៍របស់អធិការដ្ឋាននគរបាលខណ្ឌដូនពេញ សហការជាមួយសមត្ថកិច្ចជំនាញចរាចរណ៍ផ្លូវគោករបស់ស្នងការដ្ឋាននគរបាលរាជធានីភ្នំពេញ ធ្វើការស្ទូចរថយន្តទាំង២គ្រឿង យកទៅរក្សាទុកដើម្បីរង់ចាំម្ចាស់ចូលដោះស្រាយគ្នាតាមផ្លូវច្បាប់៕ Mrr Ka