រាជធានីភ្នំពេញ ៖ យុវជនម្នាក់ កំពុងបើករម៉កដឹកបន្លែសុខៗ មិនដឹងយ៉ាងម៉េច ស្រាប់តែរេចង្កូតមកបុករថយន្តនិងម៉ូតូ របស់កងរាជអាវុធហត្ថខណ្ឌបឹងកេងកង បណ្តាលឲ្យរងការខូចខាតជាច្រើនគ្រឿង បង្កការភ្ញាក់ផ្អើលកាលពីវេលាម៉ោង ២រំលងអាធ្រាត្រ ឈានចូលថ្ងៃទី១៣ ខែវិច្ឆិកា ឆ្នាំ២០២១ នៅចំណុចផ្លូវបំបែកជា៤ ស្តុបទួលទំពួង សង្កាត់បឹងកេងកងទី៣ ខណ្ឌបឹងកេងកង រាជធានីភ្នំពេញ។
ប្រភពព័ត៌មានពីសមត្ថកិច្ចជំនាញចរាចរណ៍ របស់អធិការដ្ឋាននគរបាលខណ្ឌបឹងកេងកង បានដឹងថា មុនពេលកើតហេតុ គេឃើញយុវជនម្នាក់ បានបើកម៉ូតូសណ្ដោងរ៉ឺម៉កដឹកបន្លែមួយគ្រឿង គ្មានស្លាកលេខ បើកមកដល់ផ្លូវម៉ៅសេទុង ចំផ្លូវបំបែក ជាមួយស្តុបទួលទំពូង ស្រាប់តែរេចង្កូត ទៅបុកនឹងម៉ូតូឌ្រីមសេ១២៥ មួយគ្រឿង ដែលពាក់ស្លាកលេខ ភ្នំពេញ 1FX-3874 បណ្ដាលឲ្យរងរបួសធ្ងន់ម្នាក់ ត្រូវបានបញ្ជូនទៅកាន់មន្ទីរពេទ្យៗ រួចម៉ូតូសណ្ដោងរ៉ឺម៉កដឹកបន្លែនោះ មិនទាន់អស់ល្បឿន ក៏បានរេចង្កូតទៅបុកចូលមូលដ្ឋានកងរាជអាវុធហត្ថខណ្ឌបឹងកេងកង បណ្ដាលឲ្យរងការខូចខាតម៉ូតូនិងរថយន្ត របស់កងរាជអាវុធហត្ថអស់ជាច្រើនគ្រឿងថែមទៀត។
ក្រោយពេលកើតហេតុ សមត្ថកិច្ចជំនាញចរាចរណ៍របស់អធិការដ្ឋាននគរបាលខណ្ឌបឹងកេងកង បានមកដល់បានធ្វើការវាស់វែងយកមធ្យោបាយធ្វើដំណើរខាងលើ យកទៅរក្សាទុកនៅឯអធិការដ្ឋាននគរបាលខណ្ឌបឹងកេងកង ដើម្បីរង់ចាំការដោះស្រាយគ្នានៅពេលក្រោយទៀត៕ Mrr Tra
