ខេត្តកណ្តាល ៖ ផ្ទះប្រជាពលរដ្ឋចំនួន៣ខ្នង ត្រូវបានអគ្គិភ័យឆាបឆេះយ៉ាងសន្ធោសន្ធៅ ខ្ទេចអស់គ្មានសល់ បង្កការភ្ញាក់ផ្អើលដល់អ្នកភូមិ កាលពីវេលាម៉ោង ៣ រសៀល ថ្ងៃទី១២ ខែវិច្ឆិកា ឆ្នាំ២០២១ នៅចំនុចភូមិកោះតូច ឃុំកោះឧកញ៉ាតី ស្រុកខ្សាច់កណ្តាល ខេត្តកណ្តាល ។ នេះបើយោងតាមផេក នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ ។

សមត្ថកិច្ចបានឲ្យដឹងថា ម្ចាស់ផ្ទះរងគ្រោះមានឈ្មោះ ដួងផៃ ភេទ ប្រុស អាយុ៧១ ឆ្នាំ ជាបុរសពោះម៉ាយ នៅភូមិកោះតូច ឃុំកោះឧកញ៉ាតី ស្រុកខ្សាច់កណ្ដាល ខេត្ត កណ្ដាល ។

ក្នុងនោះ ហេតុការណ៍នេះ បានឆេះបំផ្លាញ ផ្ទះឈើបីខ្នងប្រក់ក្បឿង ជញ្ជាំឈើទទឹង ៧,៥០ បណ្តោយ ៩,៩៧ ម៉ែត្រ ឆេះអស់ទាំងស្រុង , បាត់ បង់ អស់ថវិកាចំនួន ០៧ ម៉ឺនរៀល, ប្រាក់ដុល្លារ ចំនួន ៥០ ដុល្លារ, កៅអ៊ីផ្តៅ ចំនួន ០៣, ទូរទឹកកក ចំនួន ០១, គ្រែឈើចំនួន ០១, កីឈើតម្បាញ ចំនួន ០១ ទើបរលត់ទៅវិញនៅវេលាម៉ោង ៤និង៣០ នាទីរសៀល ថ្ងៃដដែល ខណៈមូលហេតុសមត្ថកិច្ចបញ្ជាក់ថា បណ្ដាលមកពីទុស្សខ្សែភ្លើង ៕