រាជធានីភ្នំពេញ ៖ ជនសង្ស័យចំនួន៣នាក់ ក្នុងចំណោមបក្ខពួក ៤នាក់ ដែលមានវ័យចាស់ៗអស់ទៅហើយ មិនគិតសន្សំកុសល ធ្វើបុណ្យទាន រកវត្តវ៉ា បែរជាធ្វើសកម្មភាពទម្លាក់យោង ដោយប្រើល្បិចយកខ្សែកកាឡៃ ដូរយកខ្សែកពិត ពីប្រជាពលរដ្ឋ ឆបោកយកទ្រព្យសម្បត្តិដែលគេខំរកមកទាំងលំបាក ត្រូវបានសមត្ថកិច្ចស្រាវជ្រាវចាប់ខ្លួនបានជាបន្តបន្ទាប់ កាលពីវេលាម៉ោង ១២ថ្ងៃត្រង់ ថ្ងៃទី១០ ខែវិច្ឆិកា ឆ្នាំ២០២១ ។
សមត្ថកិច្ចបានឲ្យដឹងថា ជនសង្ស័យដែលឃាត់ខ្លួនបានទាំង ០៣នាក់ រួមមានឈ្មោះ ៖
១.ឈ្មោះ យិន វ៉ន់នី ហៅ តាខ្មៅ ភេទប្រុស អាយុ ៥៣ឆ្នាំ មុខរបរ មិនពិតប្រាកដ ស្នាក់នៅ ភូមិគោកឃ្លាង សង្កាត់គោកឃ្លាង ខណ្ឌសែនសុខ រាជធានីភ្នំពេញ។
២,ឈ្មោះ ជី ណាង ហៅ ម៉អាឈុន ភេទស្រី អាយុ ៤០ឆ្នាំ មុខរបរ មិនពិតប្រាកដ ស្នាក់នៅ ភូមិក្បាលដំរី២សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។
៣.ឈ្មោះ សួន ស្រីមុំ ហៅ យាយស្វិត ភេទស្រី អាយុ ៥៤ឆ្នាំ មុខរបរ មិនពិតប្រាកដ ស្នាក់នៅ ភូមិដីថ្មី សង្កាត់គោកឃ្លាង ខណ្ឌសែនសុខ រាជធានីភ្នំពេញ។
ចំណែកបក្ខពួកម្នាក់ទៀត ឈ្មោះ គោ ភេទប្រុស អាយុប្រហែល ៤២ឆ្នាំ។ (គេចខ្លួន) ដកហូតបាន ខ្សែក ពណ៌មាស ចំនួន ០១ខ្សែ។
សមត្ថកិច្ចបានឲ្យដឹងថា មុនពេលកើតហេតុ នៅព្រឹកថ្ងៃទី១០ ខែវិច្ឆិកា ឆ្នាំ២០២១ ជនរងគ្រោះឈ្មោះ ហុក បូណា បានមកជូយលក់ កាហ្វេបងស្រី ក្នុងផ្សារបូរីពិភពថ្មី កំបូល១ ភូមិត្រពាំងគល់(សង្កាត់កន្ទោក) ពេលនោះជនសង្ស័យឈ្មោះ យិន វ៉ាន់នី ហៅ តាខ្មៅ បានទូរស័ព្ទទៅជនសង្ស័យឈ្មោះ ជី ណាង ហៅម៉ែអាឈុន , ជនសង្ស័យឈ្មោះ សួន ស្រីមុំ ហៅ យាយស្វិត, ជនសង្ស័យឈ្មោះ តោ, ឈ្មោះ អឿន, ឈ្មោះ សេត ឲ្យមកជួបជុំគ្នា នៅហាងកាហ្វេម្ដុំផ្សារឈូកមាស (ខណ្ឌសែនសុខ) បន្ទាប់មកជនសង្ស័យទាំង៤នាក់ បានមកជួបជុំគ្នាកន្លែងបានណាត់ ដោយជនសង្ស័យឈ្មោះ តោ ដើរតួ ជាអ្នកជ្រុះកាបូបលុយ(មានដាក់ខ្សែក) ជនសង្ស័យឈ្មោះ ជី ណាង ហៅ ម៉ែអាឈុន ជាអ្នករើសបានកាបូបលុយនោះ ហើយខ្សែកកាឡៃនោះ គឺកាលពីល្ងាច ថ្ងៃទី០៩ ខែវិច្ឆិកា ឆ្នាំ២០២១ នៅក្នុងផ្សារស៊ិនជូរី ក្នុងតម្លៃ ២០,០០០រៀល រួមទាំងថង់ក្រហម , ជនសង្ស័យឈ្មោះ សួន ស្រីមុំ ហៅ យាយស្វិតដើរតួធ្វើជាអ្នកស្រែកសួរថា «អ្នកណារើស បានកាបូបលុយ» ពេលនិយាយគ្នារួច ជនសង្ស័យឈ្មោះ តោ បានបើកម៉ូតូម៉ាកហុងដាសេ១២៥ ពណ៌ខ្មៅ មិនចាំផ្លាកលេខ បើកឌុបជនសង្ស័យឈ្មោះ ជី ណាង ហៅ ម៉ែអាឈុន អង្គុយកណ្តាល និងជនសង្ស័យឈ្មោះ សួន ស្រីមុំ ហៅ យាយស្វិត អង្គុយក្រោយ ដើររកធ្វើសកម្មភាពទំលាក់យោង ពេលជិះម៉ូតូដល់ចំណុចម្ដុំផ្សារបូរីកំបូល ភូមិ ត្រពាំងគល់(សង្កាត់កន្ទោក) ស្រាប់តែ ឃើញជនរងគ្រោះ មានពាក់ខ្សែកផ្លាកទីន និងក្រវិលផ្លាកទីន កំពុងឈរនៅតូបលក់កាហ្វេ និងមានសភាពស្ងាត់ ជនសង្ស័យឈ្មោះ តោ បានឈប់ម៉ូតូ ហើយឲ្យជនសង្ស័យឈ្មោះ ជី ណាង ហៅ ម៉ែអាយុន និងជនសង្ស័យឈ្មោះ យាយស្វិត ចុះពីលើម៉ូតូ រួចជនសង្ស័យឈ្មោះ តោ បានជិះម៉ូតូ ទៅក្បែរជនរងគ្រោះ ហើយជនសង្ស័យឈ្មោះ តោ និយាយថា «ខ្លួនបានជ្រុះកាបូបលុយ មានដឹងអ្នកណារើសបានអត់» រួចជនសង្ស័យ ឈ្មោះ តោ បានជិះម៉ូតូទៅមុខបាត់ ជនសង្ស័យឈ្មោះ សួន ស្រីមុំ ហៅ យាយស្វិត បានដើរទៅជិតជនរងគ្រោះ ហើយ និយាយថា «អ្នកណារើសបានកាបូបនោះ ឲ្យគាត់វិញទៅ» បន្ទាប់មកជនសង្ស័យឈ្មោះ ជី ណាង ហៅ ម៉ែអាឈុន បាន ដើរទៅជិតជនរងគ្រោះទៀត ហើយនិយាយថា «ខ្លួនរើសបានកាបូបលុយនោះ កុំប្រាប់អ្នកណា ដឹងតែយើង ០៣នាក់ បានហើយ» ស្របពេលនោះ ប្អូនប្រុសរបស់ជនរងគ្រោះបានដើរមកដល់ ជនសង្ស័យឈ្មោះ ជី ណាង ហៅ ម៉ែអាឈុន និងជនសង្ស័យឈ្មោះ សួន ស្រីមុំ ហៅ យាយស្វិត បាននាំគ្នាដើរចេញពីជនរងគ្រោះ ទៅឡើងជិះម៉ូតូជាមួយជនសង្ស័យឈ្មោះ តោ ដែលឈប់ចាំនៅក្បែរនោះ តែជនសង្ស័យឈ្មោះ ជី ណាង ហៅ ម៉ែអាឈុន ឡើងជិះមិនទាន់ត្រូវ ប្អូនប្រុសរបស់ជនរងគ្រោះចាប់ដៃជាប់ រួមទាំងខ្សែក ចំនួន ០១ខ្សែ ពណ៌មាស (ដែលជនសង្ស័យឈ្មោះ ជី ណាង ហៅ ម៉ែអាឈុន ដាក់ជាប់ខ្លួន) ។ ចំណែកជនសង្ស័យឈ្មោះ សួន ស្រីមុំ ហៅ យាយស្វិត និងជនសង្ស័យឈ្មោះ តោ បានជិះ ម៉ូតូគេចខ្លួនបាត់ ។
បន្ទាប់មក សន្តិសុខបូរីផ្សារកំបូល បានមកដល់ ជនរងគ្រោះ និងសន្តិសុខ បាននាំខ្លួនជនសង្ស័យ ឈ្មោះ ជី ណាង ហៅ ម៉ែអាឈុន រួមទាំង ខ្សែក ពណ៌មាស ចំនួន ០១ខ្សែ យកមកប្រគល់ឲ្យសមត្ថកិច្ចប៉ុស្តិ៍នគរបាល រដ្ឋបាលកន្ទោក និងបានដាក់ពាក្យបណ្តឹងចោទប្រកាន់លើជនសង្ស័យតែម្ដង។
បន្ទាប់ពីមានចម្លើយសារភាពរបស់ជនសង្ស័យឈ្មោះ ជី ណាង ថា «ខ្លួន និងបក្ខពួក(ឈ្មោះ សួន ស្រីមុំ ហៅ យាយស្វិត, ឈ្មោះ យិន វ៉ាន់នី ហៅ តាខ្មៅ និងឈ្មោះ តោ) បានធ្វើសកម្មភាពប្រើល្បិចយកខ្សែកកាឡៃ ដូរយកខ្សែក និងក្រវិល ពិតប្រាកដមែន»។ ដល់វេលាម៉ោងប្រហែល ១២ សមត្ថកិច្ចបានឈានទៅឃាត់ខ្លួនជនសង្ស័យឈ្មោះ យិន វ៉ាន់អី ហៅ តាខ្មៅ កំពុងឈរនៅចំណុចតាមផ្លូវបេតុង ភូមិកន្ទោកខាងជើង សង្កាត់កន្ទោក ខណ្ឌកំបូល រាជធានីភ្នំពេញ នាំយកមក សាកសួរ។ លុះដល់ម៉ោងប្រហែល២រសៀល សមត្ថកិច្ចយើងបានសហការណ៍ជាមួយសមត្ថកិច្ចខណ្ឌសែនសុខ នាំខ្លួនជនសង្ស័យឈ្មោះ ជី ណាង ហៅ ម៉ែអាឈុន និងជនសង្ស័យឈ្មោះ យិន វ៉ាន់នី ហៅ តាខ្មៅ ទៅចង្អុលបន្ទប់ ជួលរបស់ជនសង្ស័យឈ្មោះ សួន ស្រីមុំ ហៅ យាយស្វិត នៅភូមិដីថ្មី សង្កាត់គោកឃ្លាង ខណ្ឌសែនសុខ រាជធានីភ្នំពេល ពេលទៅដល់ ក៏ឃើញជនសង្ស័យឈ្មោះ សួន ស្រីមុំ ហៅ យាយស្វិត កំពុងឈរនៅមុខបន្ទប់ជួល ក៏ឃាត់ យកមកសាកសួរបន្ត ចំណែកជនសង្ស័យឈ្មោះ តោ បានគេចខ្លួនបាត់។
បច្ចុប្បន្នជនសង្ស័យទាំង៣នាក់ខាងលើ ត្រូវបានសមត្ថកិច្ចធ្វើការសាកសួរ និងកសាងសំណុំរឿងឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌកំបូល ដើម្បីកសាងសំណុំរឿងបញ្ជូនខ្លួនទៅកាន់តុលាការ ចាត់ការតាមច្បាប់បន្តទៀត ៕ នុច
