រាជធានីភ្នំពេញ ៖ បុរសម្នាក់ បើករថយន្ដ ហាយឡែនឌ័រមួយគ្រឿង បុករបាំងថ្មពុះចែកទ្រូងផ្លូវពេញទំហឹង បណ្ដាលអោយរថយន្ដដាច់កង់ទៅមុខលែងរួចតែម្តង សំណាងណាស់គ្មានអ្នករបួស បង្កការភ្ញាក់ផ្អើលដល់អ្នកដំណើរ កាលពីវេលាម៉ោង ៣ ទៀបភ្លឺថ្ងៃទី ១៥ ខែវិច្ឆិកា ឆ្នាំ ២០២១ នៅតាមបណ្ដោយផ្លូវសហព័ន្ធរុស្សី ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ។

ប្រភពព័ត៌មានពីបងប្អូនប្រជាពលរដ្ឋបានឲ្យដឹងថា មុនពេលកើតហេតុ គេបានឃើញរថយន្ត ហាយឡែនឌ័រ មួយគ្រឿង ដែលពាក់ស្លាកលេខ ភ្នំពេញ 2AT-6296 ធ្វើដំណើរតាមបណ្ដោយផ្លូវសហព័ន្ធរុស្សី ក្នុងទិសដៅពីកើតមកលិច មកដល់ចំណុចកើតហេតុ ក៏បានរេចង្កូតទៅបុករបាំងថ្មពុះចែកទ្រូងផ្លូវ ពេញមួយទំហឹង បណ្ដាលអោយរងការខូចខាត។ សំណាងល្អមិនមានមនុស្សរងរបួសនោះឡើយ។

ក្រោយពេលកើតហេតុ សមត្ថកិច្ចជំនាញចរាចរណ៍របស់អធិការដ្ឋាននគរបាលខណ្ឌដូនពេញ បានធ្វើការស្ទូច និងយករថយន្ដខាងលើ ទៅរក្សាទុកនៅការិយាល័យចរាចរណ៍ផ្លូវគោក ដើម្បីរង់ចាំម្ចាស់ចូលមកដោះស្រាយតាមផ្លូវច្បាប់ ៕ Mrr Tra