រាជធានីភ្នំពេញ ៖ បុរសម្នាក់ចុះញ៉ាំអីមួយភ្លែតសោះ ស្រាប់តែមានជនសង្ស័យ មកធ្វើសកម្មភាពលួចយករថយន្ត ម៉ាកហាយឡែនឌ័រ មួយគ្រឿង ទៅបាត់ស្រមោល កាលពីវេលាម៉ោង ៨យប់ ថ្ងៃទី១៤ ខែវិច្ឆិកា ឆ្នាំ២០២១ នៅតាមផ្លូវ២៦៥ កែង១៤៦ ក្នុងសង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ ។

ប្រភពព័ត៌មានពីជនរងគ្រោះបានឲ្យដឹងថា មុនពេលកើតហេតុ គាត់បានបើករថយន្ដ ហាយឡែនឌ័រ មួយគ្រឿង ដែលពាក់ស្លាកលេខ ភ្នំពេញ 2BG-9002 មកដល់ចំណុចកើតហេតុ គាត់ក៏បានចុះមកទិញអីញ៉ាំមួយភ្លែតសោះ ស្របពេលមេឃកំពុងធ្លាក់ភ្លៀងខ្លាំង ក៏មានក្រុមជនសង្ស័យ បានធ្វើសកម្មភាពលួចឡើងបើករថយន្ដរបស់គាត់ ទៅបាត់តែម្តង លុះម្ចាស់រថយន្ត ចេញពីញ៉ាំអីវិញ ដើររករថយន្ដខ្លួនឯងនៅតែមិនឃើញ ទើបដឹងថាត្រូវចោរលួចទៅបាត់ ។

ក្រោយពេលកើតហេតុ ជនរងគ្រោះបានមកដល់ប៉ុស្ដិ៍នគបាលទឹកល្អក់ទី២ ដើម្បីដាក់ពាក្យប្ដឹង សុំឲ្យសមត្ថកិច្ចជួយស្រាវជ្រាវតាមរករថយន្ត និងតាមចាប់ជនសង្ស័យទាំងនោះ យកមកផ្តន្ទាទោសតាមច្បាប់បន្តទៀត ៕ Mrr Ka