ខេត្តព្រះសីហនុ ៖ គ្រោះថ្នាក់ចរាចរណ៍មួយកើតឡើង បង្កដោយរថយន្ដ០១គ្រឿងម៉ាក FORD RANDGER បុកជាមួយម៉ូតូហុងដាសេ១២៥ បណ្តាលឲ្យមនុស្ស២នាក់ រងរបួស ត្រូវបានបញ្ជូនទៅកាន់មន្ទីរពេទ្យ កាលពីវេលាម៉ោង ៩ និង១៥នាទី យប់ថ្ងៃទី១២ ខែវិច្ឆិកា ឆ្នាំ២០២១ លើផ្លូវជាតិលេខ៤ ចន្លោះគីឡូម៉ែត្រលេខ ២១០-២១១ ក្នុងភូមិចំណោតរាម ឃុំបិតត្រាំង ស្រុកព្រៃនប់ ខេត្តព្រះសីហនុ។
សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះ កើតឡើងរវាង រថយន្ដ ០១គ្រឿងម៉ាក FORD RANDGER ពណ៌ស ពាក់ផ្លាកលេខ ភ្នំពេញ 2BM-6921 ដែលមានទិសពីរាជធានីភ្នំពេញ ឆ្ពោះទៅ ខេត្តព្រះសីហនុ បើកបរដោយឈ្មោះ ចាន់ គ័ង ភេទប្រុស អាយុ២៦ឆ្នាំ មានទីលំនៅភូមិ៣ សង្កាត់២ ក្រុងព្រះសីហនុ ខេត្តព្រះសីហនុ ។ លុះមកដល់ចំណុចខាងលើ រថយន្ដបានប្ដូរទិសដៅពីស្ដាំមកឆ្វេង(បត់ចូលផ្លូវជំទាវម៉ៅ) ខណៈនោះមានម៉ូតូ ០១ គ្រឿង ម៉ាក HONDA DREAM C125 ពណ៌ខ្មៅ គ្មានផ្លាកលេខ ដែលមានទិស ដៅផ្ទុយគ្នាបើកបរដោយឈ្មោះ ណាំ នួន ភេទប្រុស អាយុ៣២ឆ្នាំ មានទីលំនៅភូមិព្រៃនប់១ ឃុំព្រៃនប់ ខេត្តព្រះសីហនុ បានបុកពីមុខរថយន្តចំចង្កៀងមុខផ្នែកខាងស្តាំតែម្តង បណ្តាលឲ្យភាគីខាងម៉ូតូ២នាក់ រួមមាន ៖
១/ឈ្មោះ ណាំ នួន អ្នកបើកបរម៉ូតូ ម៉ាក HONDA DREAM C125 (រងរបួសមធ្យម)។
២/ឈ្មោះ សុខ សឹម ភេទប្រុស អាយុ២៩ឆ្នាំ ស្នាក់នៅភូមិព្រៃនប់១ ឃុំព្រៃនប់ ស្រុកព្រៃនប់ ខេត្តព្រះសីហនុ អ្នករួមម៉ូតូ ម៉ាក HONDA DREAM C125 (រងរបួសមធ្យម)។
បច្ចុប្បន្ន ជនរងគ្រោះបានបញ្ជូនទៅសម្រាកព្យាបាលនៅមន្ទីរពេទ្យសេតេ ខេត្តព្រះសីហនុ រីឯវត្ថុតាងម៉ូតូ យកមករក្សាទុកនៅអធិការដ្ឋាននគរបាលស្រុកព្រៃនប់ ៕ សំណាង
