រាជធានីភ្នំពេញ ៖ នារីម្នាក់ ជានិស្សិតឆ្នាំទី៤បានទ្រហ៊ោយំលោកដៃសំពះអង្វរ ក្រោយត្រូវបានក្រុមចោរឆក់កាបូប ដែលមានទូរសព្ទ និងប៉ាស្ព័រភ្ញៀវជនជាតិវៀតណាម ចំនួន ៥សន្លឹក យកទៅបាត់ នៅតាមដងផ្លូវ២១៧ ហើយរត់គេចខ្លួនបាត់ស្រមោល ខណៈនារីរងគ្រោះបានទ្រហ៊ោយំ អង្វរ សុំឲ្យលោកចោរក្តី និងបងប្អូនប្រជាពលរដ្ឋក្តី បើប្រទះឃើញបាស្ព័រភ្ញៀវជនជាតិវៀតណាមទាំង៥ក្បាលនោះ ដែលចោរបានបោះចោលនៅកន្លែង សូមជួយទាក់ទងមកនាងផង ព្រោះជារបស់ភ្ញៀវ ណាមួយឯកសារទាំងនោះ លោកចោរយកទៅធ្វើអ្វីក៏មិនកើតដដែល ដោយឡែកទូរសព្ទ និងទ្រព្យសម្បត្តិផ្សេងទៀតនៅក្នុងកាបូបរបស់នារីខាងលើ គាត់បាននិយាយថា យកចុះ គាត់មិនយកវិញនោះទេ សុំត្រឹមឯកសារតែប៉ុណ្ណោះ ។
ហេតុការណ៍នេះបានកើតឡើង កាលពីវេលាម៉ោង៨យប់ ថ្ងៃទី១៨ ខែវិច្ឆិកា ឆ្នាំ២០២១ នៅចំណុចផ្លូវ២១៧ ក្បែរផ្សារស្ទឹងមានជ័យចាស់ ក្នុងសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។
នារីរងគ្រោះខាងលើបានរៀបរាប់ទាំងទឹកភ្នែកប្រាប់ក្រុមការងារ TVFB ឲ្យដឹងថា គាត់មានឈ្មោះ សុខ សំណាង អាយុ២៤ឆ្នាំ ជានិស្សិតឆ្នាំទី៤ ខំធ្វើការងារក្រៅម៉ោង ជាអ្នករត់ឯកសារឲ្យគេ ក្រែងបានលុយខ្លះសម្រាប់ផ្គត់ផ្គង់ជីវភាពប្រចាំថ្ងៃ ហើយរាល់ដង គាត់មិនដែលប្រហែលយកឯកសារទាំងនោះតាមខ្លួននោះទេ តែយប់ថ្ងៃកើតហេតុនេះ គាត់បានយកឯកសារភ្ញៀវ ពោលគឺប៉ាស្ព័រជនជាតិវៀតណាមទាំង៥ក្បាល អត្តសញ្ញាណប័ណ្ណ កាតចាក់វ៉ាក់សាំង និងទូរសព្ទរបស់ខ្លួន ដាក់ក្នុងកាបូប ដើម្បីជិះម៉ូតូគ្រឿងម៉ាក GBX ពណ៌ឈាមជ្រូក គ្មានផ្លាកលេខ តែម្នាក់ឯង ចុះពីលើស្ពានអាកាសស្ទឹងមានជ័យ តាមបណ្តោយផ្លូវ២១៧ ពីកើតមកលិច បំណងទៅផ្ទះវិញ តែមកដល់កន្លែងកើតហេតុ ក៏ត្រូវក្រុមចោរ ដែលមានគ្នា៣នាក់ ជិះម៉ូតូ២គ្រឿងមិនចាំស្លាកលេខ ឆក់យកកាបូបរបស់គាត់បានសម្រេចហើយជិះរត់គេចខ្លួន ពេលនោះ គាត់ក៏បានស្រែកចោរៗដែរ តែគ្មានអ្នកណាជួយដេញតាមឲ្យគាត់នោះឡើយ គាត់ក៏បានទៅដាក់ពាក្យបណ្តឹងនៅប៉ុស្តិ៍ស្ទឹងមានជ័យទី១ ភ្លាមៗផងដែរ ដើម្បីឲ្យសមត្ថកិច្ចជួយស្រាវជ្រាវតាមចាប់ក្រុមចោរទាំងនេះ ។
ខណៈនារីរងគ្រោះបានទ្រហ៊ោយំ អង្វរ សុំឲ្យលោកចោរក្តី និងបងប្អូនប្រជាពលរដ្ឋក្តី បើប្រទះឃើញបាស្ព័រភ្ញៀវជនជាតិវៀតណាមទាំង៥ក្បាលនោះ ដែលចោរបានបោះចោលនៅកន្លែង សូមជួយទាក់ទងមកនាងផង ព្រោះជារបស់ភ្ញៀវ ណាមួយឯកសារទាំងនោះ លោកចោរយកទៅធ្វើអ្វីក៏មិនកើតដដែល ដោយឡែកទូរសព្ទ និងទ្រព្យសម្បត្តិផ្សេងទៀតនៅក្នុងកាបូបរបស់នារីខាងលើ គាត់បាននិយាយថា យកចុះ គាត់មិនយកវិញនោះទេ សុំត្រឹមឯកសារតែប៉ុណ្ណោះ អាចទាក់ទងមកជនរងគ្រោះបាន តាមរយៈលេខទូរសព្ទរបស់គាត់ គឺ ០៧០ ៦១១ ៨១១ ឬក៏លេខទូរសព្ទប៉ារបស់គាត់ ០៩៧ ៧៩១០០២០ គាត់នឹងជូនជាសគុនទៅវិញ ៕ នុច
