រាជធានីភ្នំពេញ ៖ កម្លាំងប៉ុស្តិ៍នគរបាលរដ្ឋបាល ក្បាលកោះ ឃាត់ខ្លួនជនសង្ស័យម្នាក់ ករណីលួចម៉ូតូ កាលពីវេលាម៉ោង៣រសៀល ថ្ងៃទី២២ ខែវិច្ឆិកា ឆ្នាំ២០២១ នៅចំណុចមុខបន្ទប់ជួល ផ្លូវបេតុង ភូមិយកបាត្រ សង្កាត់ក្បាលកោះ ខណ្ឌច្បារអំពៅ។ នេះបើយោងតាមផេក ស្នងការដ្ឋាននគរបាលរាជធានីភ្នំពេញ ។
សមត្ថកិច្ចបានឲ្យដឹងថា ជនរងគ្រោះឈ្មោះ យ៉ែម សុធារី ភេទស្រី អាយុ៣១ឆ្នាំមុខរបរ មេផ្ទះ ស្នាក់នៅបន្ទប់កើតហេតុ។ ចំណែកជនសង្ស័យដែលឃាត់ខ្លួនបានមានឈ្មោះ ងីម ខួច ភេទប្រុស អាយុ៣២ឆ្នាំ មុខរបរគ្មាន ស្នាក់នៅភូមិជ្រោយអំពិល១ សង្កាត់ក្បាលកោះ ខណ្ឌច្បារអំពៅ (មានសារធាតុញៀន)។
សូមបញ្ជាក់ថា មុនពេលកើតហេតុ ជនរងគ្រោះបានទុកម៉ូតូម៉ាក Honda Scoopy ពណ៌ខ្មៅ គ្មានផ្លាកលេខ នៅចំណុចកើតហេតុ លុះរហូតដល់ម៉ោង០៤និង៣០នាទី ថ្ងៃទី២២ ខែវិច្ឆិកា ឆ្នាំ២០២១ ជនរងគ្រោះងើបពីដេកស្រាប់តែបាត់ម៉ូតូ ក៏មករាយការណ៍ជូនសមត្ថកិច្ច ដើម្បីដាក់ពាក្យបណ្តឹង។
ក្រោយពីទទួលបានពាក្យបណ្តឹងពីជនរងគ្រោះ នៅវេលាម៉ោង៣រសៀលថ្ងៃដដែល សមត្ថកិច្ចបើកប្រតិបត្តិការស្រាវជ្រាវ រហូតដល់ឈានឃាត់ខ្លួនជនសង្ស័យ នៅភូមិជ្រោយអំពិល១ សង្កាត់ក្បាលកោះ រួមនិងវត្ថុតាងម៉ូតូរបស់ជនរងគ្រោះ បញ្ជូនមកប៉ុស្តិ៍នគរបាលរដ្ឋបាល ក្បាលកោះ ធ្វើការសាកសួរ។
សមត្ថកិច្ចបានបញ្ជាក់ទៀតថា ជនសង្ស័យធ្លាប់ជាប់ពន្ធនាគារព្រៃស ០៣លើក ៖
-លើកទី១ ៖ ក្នុងឆ្នាំ២០០៧ រយៈពេល ០១ឆ្នាំ ពីបទ ៖ លួច ។
-លើកទី២ ៖ ក្នុងឆ្នាំ២០១៦ រយៈពេល ០២ឆ្នាំ ពីបទ ៖ រក្សាទុកដោយខុសច្បាប់ នូវសារធាតុញៀន។
-លើកទី៣ ៖ ក្នុងឆ្នាំ២០២០ រយៈពេល ០១ឆ្នាំ ពីបទ ៖ រំលោភលើទំនុកចិត្ត។
បច្ចុប្បន្នជនសង្ស័យ កម្លាំងជំនាញកំពុងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធីច្បាប់៕
