ខេត្តព្រះសីហនុ ៖ នារីជនជាតិចិនម្នាក់ ជិះម៉ូតូបត់ឆ្វេងមិនប្រយ័ត្នជ្រុល ទៅបុកជាមួយនិងម៉ូតូបុរស៣នាក់ ដែលជិះស្របផ្លូវពេញទំហឹង បណ្ដាលឲ្យរងរបួសទាំងសងខាង កាលពីវេលាម៉ោង ១០និង២០នាទី យប់ថ្ងៃទី២២ ខែវិច្ឆិកា ឆ្នាំ២០២១ នៅចំណុចផ្លូវឆ្នេរអូឈើទាល ក្នុងសង្កាត់លេខ៤ ក្រុងព្រះសីហនុ ខេត្តព្រះសីហនុ។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ ដោយមានបុរស៣នាក់ជិះម៉ូតូ១គ្រឿងម៉ាក Zoomer-X ពណ៌ខ្មៅលាយក្រហម គ្មានស្លាកលេខ បានជិះតាមបណ្ដោយផ្លូវអូឈើទាល ក្នុងទិសដៅពីកើតទៅលិច ខណៈពេលទៅដល់ចំណុចកន្លែងកើតហេតុ មាន នារីជនជាតិចិនម្នាក់ ជិះម៉ូតូ១គ្រឿង ម៉ាកAir blade ពណ៌ខ្មៅលាយទឹកក្រូច ពាក់ស្លាកលេខ ឧ.មានជ័យ 1A-9549 បើកបរតាមបណ្ដោយផ្លូវ ៥០១ ទិសដៅពីជើងទៅត្បូង ខណៈដល់កន្លែងកើតហេតុបានបត់ឆ្វេងមិនបានប្រយ័ត្នជ្រុលទៅបុកពេញមួយទំហឹងបណ្ដាលឲ្យបុរស៣នាក់នោះរងរបួសស្រាល. ចំណែកនារីជនជាតិចិនខាងលើរបួសធ្ងន់ត្រូវបានបញ្ជូនទៅមន្ទីrពេទ្យដើម្បីសង្គ្រោះ ។

ក្រោយកើតហេតុសមត្ថកិច្ចជំនាញចរាចរណ៍បានចុះមកនិងធ្វើការវាស់វែងយកម៉ូតូទាំង២គ្រឿងទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តព្រះសីហនុ រងចាំភាគីទាំងសងខាងចូលខ្លួនមកដោះស្រាយគ្នានៅពេលក្រោយ៕ សំណាង