រាជធានីភ្នំពេញ​ ៖ រថយន្តសាំយ៉ុងដឹកបន្លែមួយគ្រឿង បានបែកកង់រេចង្កូតទៅបុកជាមួយរថយន្ត Range Rover ស៊េរីទំនើប បណ្ដាលហោះទៅបុកនឹងសួនច្បារចែកទ្រូងផ្លូវ បណ្ដាលឲ្យរងរបួសធ្ងន់ម្នាក់នៅកន្លែងកើតហេតុ កាលពីវេលាម៉ោង១០យប់ ត្រូវនិងថ្ងៃទី២៥ ខែវិច្ឆិកា ឆ្នាំ២០២១ នៅតាមបណ្តោយផ្លូវជាតិលេខ៦អា ក្នុងសង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ ។

ប្រភពព័ត៌មានពីបងប្អូនប្រជាពលរដ្ឋ និងពីសមត្ថកិច្ចបានឲ្យដឹងថា មុនពេលកើតហេតុ គេឃើញរថយន្តប្រភេទដឹកបន្លែសាំយ៉ុងមួយគ្រឿង ដែលពាក់ស្លាកលេខ ភ្នំពេញ 2AY-2804 ធ្វើដំណើរតាមបណ្ដោយផ្លូវជាតិលេខ៦ អា មកដល់ចំណុចកើតហេតុ ក៏បានបែកកង់រេចង្កូតទៅបុកនឹងរថយន្ត Range Rover ស៊េរីទំនើបមួយគ្រឿង ដែលពាក់ស្លាកលេខ ភ្នំពេញ 2BL-6780 បានឈប់នៅចិញ្ចើមផ្លូវ បុកពីក្រោយពេញមួយទំហឹង បណ្ដាលឲ្យរថយន្តរងការខូចខាត ភ្លាមនោះ រថយន្តសាំយ៉ុងមិនទាន់អស់ល្បឿន ក៏បានរេចង្កូតឡើងទៅបុកសួនច្បារចែកទ្រូងផ្លូវ បណ្ដាលឲ្យមនុស្សស្រីម្នាក់ ដែលអង្គុយនៅក្បែរតៃកុងរថយន្តសាំយ៉ុងនោះ គាបជាប់ជាមួយរថយន្ត រងរបួសធ្ងន់ ត្រូវបានបញ្ជូនទៅមន្ទីរពេទ្យភ្លាមៗផងដែរ។

ក្រោយពេលកើតហេតុសមត្ថកិច្ចជំនាញចរាចរណ៍របស់អធិការនគរបាលខណ្ឌជ្រោយចង្វា បានធ្វើការវាស់វែង យករថយន្តទាំង២គ្រឿង ប្រគល់ឲ្យទៅជំនាញចរាចរណ៍ផ្លូវគោករបស់ស្នងការដ្ឋាននគរបាលរាជធានីភ្នំពេញ ដើម្បីយករថយន្ដទាំង២គ្រឿង ទៅរក្សាទុក រង់ចាំដោះស្រាយគ្នាតាមច្បាប់បន្តទៀត ៕ Mrr Ka