រាជធានីភ្នំពេញ ៖ យុវជនម្នាក់ ត្រូវបានមិត្តភក្តិស្រីៗ ដែលធ្វើដំណើរមកតាមក្រោយ ឃើញជួបគ្រោះថ្នាក់ចរាចរណ៍ បើករថយន្ត ទៅបុករថយន្តស៊ីទែនដឹកហ្គាសចំពីក្រោយ បណ្តាលឲ្យរងរបួសស្រាល វីវល់ដើរមិនចង់រួច ក្រោយមិត្តភក្តិស្រីៗនោះបានអះអាងថា យុវជនខាងលើ ទើបតែចេញពីផឹកស៊ី នៅក្នុងកម្មវិធីខួបកំណើត ដោយធម្មតា យុវជនខាងលើ មិនសូវជាពូកែផឹក ប៉ុន្មាននោះទេ ទើបជួបគ្រោះថ្នាក់បែបនេះ បង្កការភ្ញាក់ផ្អើល នៅម៉ោង ១១ និង៤០នាទី ថ្ងៃទី២៥ ខែវិច្ឆិកា ឆ្នាំ២០២១ នៅតាមបណ្ដោយផ្លូវជាតិលេខ១ ស្ថិតក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ ។

ប្រភពព័ត៌មានបានឲ្យដឹងថា មុនពេលកើតហេតុ គេបានឃើញ យុវជនម្នាក់ បើករថយន្តស៊េរីទំនើបមួយគ្រឿង ម៉ាក TITANIUM ពណ៌ស ពាក់ស្លាកលេខ ភ្នំពេញ 2BL-7734 ក្នុងល្បឿនលឿនពីកើតទៅលិច ស្រាប់តែរេចង្កូតជ្រុលទៅបុកពីក្រោយរថយន្តស៊ីទែនដឹកហ្គាសធុនធំ ក្បាលពណ៌ស ពាក់ស្លាកលេខ ភ្នំពេញ 3G-6166 ពេញទំហឹង ផ្ទុះពោងរថយន្ត បោកក្បាល រងរបួសស្រាល និងខ្ទេចរថយន្តយ៉ាងដំណំតែម្តង ។

ក្រោយពេលកើតហេតុ សមត្ថកិច្ចមូលដ្ឋាន និងសមត្ថកិច្ចជំនាញចរាចរណ៍ បានចុះមកធ្វើការវាស់វែង តែភាគីខាងរថយន្តធុនធំ មិនចង់វែងឆ្ងាយ ក៏សម្រេចយករថយន្តទៅជួសជុលខ្លួនឯងរៀងៗខ្លួនតែម្តង ៕ ពេជ្រ