រាជធានីភ្នំពេញ ៖ កម្លាំងប៉ុស្តិ៍នគរបាលទន្លេបាសាក់ បានអនុវត្តដីកាបញ្ជាស្វែងរកចាប់ខ្លួន លេខ ០០១ អ.យ.ឃ ចុះថ្ងៃទី ២៨ ខែមករា ឆ្នាំ ២០២១ របស់លោក សាយ ណូរ៉ា តំណាងអយ្យការអមសាលាដំបូងរាជធានីភ្នំពេញ ដោយចាប់ខ្លួនទណ្ឌិតម្នាក់ នៅថ្ងៃទី២៦ ខែវិច្ឆិកា ឆ្នាំ២០២១ វេលាម៉ោង ១១និង៤០នាទី នៅត្រង់ចំណុច មុខផ្ទះលេខN១២៥ ផ្លូវព្រះនរោត្តម ភូមិ៦ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។

សមត្ថកិច្ចប៉ុស្តិ៍ទន្លេបាសាក់បានប្រាប់ក្រុមការងារTVFB ឲ្យដឹងថា ទណ្ឌិតដែលត្រូវបានចាប់ខ្លួន នេះមានឈ្មោះ ជុំ យ៉ត ភេទប្រុស អាយុ ២៨ឆ្នាំ ជនជាតិខ្មែរ ស្នាក់នៅផ្ទះលេខN១២៥ ផ្លូវព្រះនរោត្តម ក្រុម៣ ៦ ភូមិ៦ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ដែលបានប្រព្រឹត្ត ករណីជួញដូរដោយខុសច្បាប់នូវសារធាតុញៀន នៅចំណុចក្បែរស្ពានហង្សកោះពេជ្រ សង្កាត់ទន្លេបាសាក់ ខណ្ឌចំការមន រាជធានី ភ្នំពេញ ហើយកាលពីថ្ងៃទី១៣ ខែមិថុនា ឆ្នាំ២០១៩ និងត្រូវសម្រេចផ្ដន្ទាទោសដាក់ពន្ធនាគារកំណត់រយះពេល០២ (ពីរ) ឆ្នាំ។

សមត្ថកិច្ចបន្តថា លុះនៅថ្ងៃទី២០ ខែមករា ឆ្នាំ ២០២១ មន្រ្តីប្រចាំការបានបញ្ជូនទណ្ឌិត ឈ្មោះ ជុំ យ៉ត មកសម្រាកព្យាបាលនៅមន្ទីពេទ្យមិត្តភាព ខ្មែរ សូវៀត ដោយ ដង្ហក់ចុកទ្រូងខាងឆ្វេង និងហើម ពេលមកដល់មន្ទីរពេទ្យទណ្ឌិត ឈ្មោះ ជុំ យ៉ត បានច្បូតច្រវ៉ាក់ចាក់ជេីងរួចចុះតាមចម្រឹងទ្វារខាងក្រោយអាគារមកក្រោមជាន់ផ្ទាល់ដី ដោះអាវកាន់ដៃស្លៀកខោជេីងខ្លីពណ៍ខៀវ ដោយអាការៈទ្រេតទ្រោត រួចក៏បានយកអាវអ្នកជំងឺដែលហាលនៅក្បែរនោះមកពាក់រួចដើរទៅជិររបងមន្ទីពេទ្យក៏ផ្លោះរបងទៅបាត់ ។

រហូតដល់ថ្ងៃទី២៦ ខែវិច្ឆិកា ឆ្នាំ២០២១ វេលាម៉ោង ១១និង៤០នាទីកម្លាំងប៉ុស្តិ៍នគរបាលរដ្ឋបាលទន្លេបាសាក់យើងបានធ្វើការស្រាវរកឃើញទណ្ឌិតឈ្មោះ ជុំ យ៉ត នៅចំណុចខាងលើក៏បានធ្វើការឃាត់ខ្លួនតែម្តង ។

បច្ចុប្បន្នទណ្ឌិតឈ្មោះ ជុំ យ៉ត កំពុងឃាត់ខ្លួននៅអធិការដ្ឋាននគរបាលខណ្ឌចំការមន ដើម្បីចាត់ការតាមនីតិវិធី៕ មេសា