រាជធានីភ្នំពេញ ៖ រថយន្តព្រូសមួយគ្រឿង បានរេចង្កូតទៅបុកឃឿន បណ្ដាលឲ្យក្រឡាប់ផ្ងើជើង បណ្តាលឲ្យមានមនុស្ស ២នាក់ រងរបួសស្រាល បង្កការភ្ញាក់ផ្អើល កាលពីវេលាម៉ោង៣ទៀបភ្លឺ ឈានចូលថ្ងៃទី២៧ ខែវិច្ឆិកា ឆ្នាំ២០២១ នៅចំណុចរង្វង់មូលចោមចៅ ក្នុងសង្កាត់ចោមចៅ ទី៣ ខណ្ឌពោធិ៍សែនជ័យ រាជធានីភ្នំពេញ។

ប្រភពព័ត៌មានពីបងប្អូនប្រជាពលរដ្ឋ ដែលបានឃើញហេតុការណ៍បានឲ្យដឹងថា មុនពេលកើតហេតុ គេឃើញមានរថយន្ដព្រូស១គ្រឿង បើកក្នុងល្បឿនលឿន ជិះគ្នា២នាក់ ស្រីម្នាក់ ប្រុសម្នាក់ បើករថយន្ដព្រូស ខាងលើ ដែលពាក់ស្លាកលេខ ភ្នំពេញ 2BA -8945 បានរេចង្កូត ទៅបុកនឹងឃឿនផ្លូវ ពេញមួយទំហឹង ក៏បណ្តាលឲ្យក្រឡាប់ផ្ងារជើង អូសជាង២០ម៉ែត្រ សំណាងល្អ ណាស់អ្នកទាំង២នាក់នោះរងរបួសស្រាល រីឯរថយន្តវិញ ខ្ទេចទាំងស្រុងតែម្តង ។

ក្រោយពេលកើតហេតុ សមត្ថកិច្ចក៏បានមកដល់ បានធ្វើការពិនិត្យវាស់វែង និងប្រគល់ឲ្យម្ចាស់ ស្ទូចយករថយន្ដព្រូសខាងលើទៅជួសជុលខ្លួនឯង ដោយសារតែមិនបានបង្កគ្រោះថ្នាក់ដល់អ្នកណា រឺខូចខាតដល់សម្បត្តិរដ្ឋ នោះទេ ៕Mrr Tra