រាជធានីភ្នំពេញ ៖ រថយន្ដ Luxes 330 មួយគ្រឿង បានទៅបុករបាំងថ្មចែកទ្រូងផ្លូវ និងបង្គោលភ្លើង បណ្ដាលឲ្យរងការខូចខាតយ៉ាងដំណំ កាលពីវេលាម៉ោង១យប់ ឈានចូលថ្ងៃទី៣០ ខែវិច្ឆិកា ឆ្នាំ២០២១ នៅតាមបណ្ដោយផ្លូវសហព័ន្ធរុស្សី សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។

ប្រភពព័ត៌មានពីបងប្អូនប្រជាពលរដ្ឋបានឲ្យដឹងថា មានរថយន្ដ Luxe’s 330 មួយគ្រឿង ដែលពាក់ស្លាកលេខ ភ្នំពេញ 2BD-1586 បើកបរដោយបុរសម្នាក់ ជាជនជាតិបរទេស ក្នុងល្បឿនលឿនតាមបណ្ដោយផ្លូវសហព័ន្ធរុស្សី ក្នុងទិសដៅពីលិចទៅកើត មកដល់ចំណុចកើតហេតុ ក៏បានរេចង្កូតទៅបុករបាំងថ្មចែកផ្លូវ និងបង្គោលភ្លើងចំនួនមួយដើម បណ្ដាលឲ្យបាក់ធ្លាក់ដល់ដីរងការខូចខាតរថយន្តយ៉ាងដំណំ រួចអ្នកបើករថយន្តនោះ បានបើកទ្វារគេចពីកន្លែងកើតហេតុបាត់តែម្តង សល់តែរថយន្តតែប៉ុណ្ណោះ។

ក្រោយកើតហេតុ សមត្ថកិច្ចមូលដ្ឋានបានទាក់ទងសមត្ថកិច្ចជំនាញចរាចរណ៍របស់ស្នងការដ្ឋាននគរបាលរាជធានីភ្នំពេញ ធ្វើការវាស់វែងនិងស្ទូចរថយន្តខាងលើ ទៅរក្សាទុកនៅស្នងការដ្ឋាននគរបាលរាជធានីភ្នំពេញ រង់ចាំម្ចាស់ចូលមកដោះស្រាយទៅតាមផ្លូវច្បាប់ ៕ Mrr Tra