ខេត្តបាត់ដំបង ៖ កម្លាំងមន្ទីរស្រាវជ្រាវ និងបង្រ្កាបបទល្មើស សហការជាមួយកម្លាំងមូលដ្ឋានកងរាជអាវុធហត្ថស្រុកឯកភ្នំ និងជំនាញជលផលស្រុកឯកភ្នំ ឃាត់ខ្លួនបានជនសង្ស័យចំនួន ៨នាក់ កាលពីវេលាម៉ោង១ និង ២៥នាទី រសៀល ថ្ងៃទី២៩ ខែវិច្ឆិកា ឆ្នាំ២០២១ ដែលជាប់ពាក់ព័ន្ធនឹងការកាប់ទន្ទ្រានដីព្រៃលិចទឹក ។ នេះបើយោងតាមផេកផ្លូវការ របស់ GRK News ។
ការបង្ក្រាបបានជនសង្ស័យទាំងនេះ គឺធ្វើឡើងខណៈ កម្លាំងមន្ទីរស្រាវជ្រាវ និងបង្រ្កាបបទល្មើស សហការជាមួយកម្លាំងមូលដ្ឋានកងរាជអាវុធហត្ថស្រុកឯកភ្នំ និងជំនាញជលផលស្រុកឯកភ្នំ បានចុះដល់ចំណុចអូរកំបុតស្ថិតក្នុងភូមិព្រែកឆ្តោ ឃុំពាមឯក ស្រុកឯកភ្នំ ខេត្តបាត់ដំបង ។
ក្នុងនោះ កម្លាំងក៏បានចាប់យកហូតវត្ថុតាងរួមមាន ត្រាត់ទ័រ ០១ គ្រឿង, គោយន្ត ០១ គ្រឿង, ការណូតស្មាច់មានម៉ាស៊ីន ០២ គ្រឿង, ម៉ាស៊ីនការណូត ០១ គ្រឿង ផងដែរ។
បច្ចុប្បន្នជនសង្ស័យខាងលើ ត្រូវបានមន្ត្រីជំនាញកំពុងកសាងសំណុំរឿងតាមនីតិវិធីច្បាប់បន្តទៀត ៕
