ខេត្តសៀមរាប ៖ កាលពីវេលាម៉ោង ៧និង៣០នាទីយប់ ថ្ងៃទី១ ខែធ្នូ ឆ្នាំ២០២១ ម្សិលមិញនេះ មានករណីអគ្គិភ័យ បានឆាបឆេះយ៉ាងសន្ធោសន្ធៅ នៅចំណុចអាគារផ្សារទំនើបអាស៊ីផ្លាហ្សា និងភោជនីយដ្ឋានអេលីត ជាន់ក្រោមដី ស្ថិតក្នុងភូមិតាភុល សង្កាត់ស្វាយដង្គំ ក្រុងសៀមរាប រហូតឆេះផ្តាច់ជីវិតមនុស្សចំនួន៣នាក់យ៉ាងរន្ធត់ និងមានមនុស្សម្នាក់ទៀត រងរបួសធ្ងន់ ។ នេះបើយោងតាមផេក អគ្គស្នងការដ្ឋាននគរបាលជាតិ ។

តាមរបាយការណ៍សមត្ថកិច្ច បានឲ្យដឹងថា ជនរងគ្រោះទី១/ឈ្មោះ អ៊ីង ស៊ីម ភេទប្រុស អាយុប្រហែល ៤២ឆ្នាំ រស់នៅភូមិបន្ទាយឈើ សង្កាត់ទឹកវិល មមុខរបរសន្តិសុខក្លឹប អេលីត (ដល់ពេទ្យខេត្តស្លាប់)។ ជនរងគ្រោះទី២/ឈ្មោះ ប្រាក់ សុភ័ណ្ឌ ភេទប្រុស អាយុ ៤១ឆ្នាំ រស់នៅបន្ទប់ជួលភូមិតាភុល មុខរបរ DJ ក្លឹបអេលីត (កំពុងសង្គ្រោះបន្ទាន់នៅពេទ្យខេត្ត)។ ជនរងទី៣/ឈ្មោះ ធី មេសា ហៅក្រៅ ចិត្ត ភេទប្រុស អាយុ ៣៦ឆ្នាំ រស់នៅភូមិកន្ត្រក សង្កាត់ស្វាយដង្គ មុខរបរសន្តិសុខ ស្លាប់នៅកន្លែងកើតហេតុ។ ជនរងគ្រោះទី៤/ឈ្មោះ ឈឿន សំណាង ភេទប្រុស អាយុ ២៦ឆ្នាំ រស់នៅភូមិខ្នា សង្កាត់ជ្រាវ មុខរបរអ្នកចម្រៀង ស្លាប់នៅកន្លែងកើតហេតុ។

តាមការបញ្ជាក់របស់សមត្ថកិច្ច ក្នុងកិច្ចប្រតិបត្តិការសង្រ្គោះ សមត្ថកិច្ចបានប្រើប្រាស់រថយន្តពន្លត់អគ្គិភ័យ ចំនួន១០គ្រឿង ក្នុងនោះ ៖ រថយន្តអគ្គិភ័យស្នងការដ្ឋាននគរបាលខេត្ត ចំនួន ៣គ្រឿង ប្រើប្រាស់ទឹកអស់ចំនួន៣ ឡាន, អធិការក្រុង ១គ្រឿង ប្រើប្រាស់ទឹកអស់ចំនួន ១ឡាន, អាវុធហត្ថ ២គ្រឿង ប្រើប្រាស់ទឹកអស់ចំនួន២ឡាន, បេតិកភណ្ឌ ១គ្រឿង ប្រើប្រាស់ទឹកអស់ចំនួន ១ឡាន, អាជ្ញាធរអប្សរា ២គ្រឿង ប្រើប្រាស់ទឹកអស់ចំនួន ២ឡាន, អាកាសយានដ្ឋានសៀមរាប ១គ្រឿង ប្រើប្រាស់ទឹកអស់ចំនួន ១ឡាន។

គួរបញ្ជាក់ថា អគ្គិភ័យខាងលើ បានរលត់ទៅវិញវេលាម៉ោង១០និង៥០នាទី យប់ថ្ងៃដដែល ខណៈមូលហេតុដែលបង្កឲ្យមានអគ្គិភ័យ បណ្តាលមកពីឆ្លងចរន្តអគ្គិសនី៕