រាជធានីភ្នំពេញ ៖ បុរស២នាក់ជិះម៉ូតូឌុបគ្នា ត្រូវបានរថយន្តក្រឡុកស៊ីម៉ង់ត៍បើកបុកកិន ចំពីក្រោយបណ្ដាលឲ្យរងរបួសធ្ងន់ ត្រូវបានបញ្ជូនទៅកាន់មន្ទីរពេទ្យ កាលពីវេលាម៉ោង៧និង៣០នាទីព្រឹក ថ្ងៃទី៣ ខែធ្នូ ឆ្នាំ២០២១ នៅបណ្តោយផ្លូវ៥០ម៉ែត្រ កែងនឹងផ្លូវបេតុងច្រកចូលបុរីជីបម៉ុង ក្នុងភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ។

ប្រភពព័ត៌មានពីសមត្ថកិច្ចបានបញ្ជាក់ប្រាប់ក្រុមការងារTVFB ឲ្យដឹងថា មុនពេលកើតហេតុ គេឃើញបុរសរងគ្រោះទាំង២នាក់ខាងលើ ជិះម៉ូតូមួយគ្រឿង ម៉ាកនិច ពណ៌ស ពាក់ស្លាកលេខ ភ្នំពេញ 1IR-2721 ជិះឌុបគ្នាពីទិសដៅ ពីត្បូងទៅជើង លុះដល់ចំណុចកើតហេតុ ស្រាប់តែមានរថយន្តក្រឡុកស៊ីម៉ងត៍របស់ក្រុមហ៊ុនជីបម៉ុងមួយគ្រឿងពណ៌ស ពាក់ផ្លាកលេខ ភ្នំពេញ 5A-0635 បើកបរដោយបុរសម្នាក់ មិនស្គាល់អត្តសញ្ញាណ បើកបរក្នុងទិសដៅស្របទិសគ្នា ក្នុងល្បឿនលឿន បានបត់ស្តាំចូលបុរីបុកកិនម៉ូតូរបស់បុរសរងគ្រោះខាងលើបណ្តាលឲ្យដួលខ្ទាតចូលក្រោមកង់រថយន្តទាំង២នាក់ ដោយម្នាក់រងរបួសបាក់ដៃ និងម្នាក់ទៀតធ្លាយក្អួតតាមមាត់ ត្រូវបានបញ្ជូនតាមរថយន្តសាមុយចំនួន២គ្រឿង ទៅកាន់មន្ទីរពេទ្យឯកជនសួគ៌ា និងមន្ទីរពេទ្យឯកជនម្លិះដង្កោ ដឹកយកទៅធ្វើការសង្រ្គោះបន្ទាន់។ ចំណែកអ្នកបើកបររថយន្តបង្កបានបើកទ្វាររថយន្តចុះរត់គេចខ្លួនបាត់ស្រមោល។

ក្រោយពេលកើតហេតុ សមត្ថកិច្ចជំនាញចរាចរណ៍ខណ្ឌដង្កោ សហការជាមួយនិងនគរបាលជំនាញចរាចរណ៍ក្រុង ចុះមកធ្វើការវាស់វែងនិងយករថយន្តបង្កនិងម៉ូតជនរងគ្រោះទៅរក្សាទុកនៅការិយាល័យចរាចរណ៍ជើងគោក នៃស្នងការនគរបាលរាជធានីភ្នំពេញ ដើម្បីធ្វើការដោះស្រាយគ្នានៅពេលក្រោយ៕ មេសា