អន្តរជាតិ៖ សារព័ត៌មាន Reuters បានចេញផ្សាយនៅថ្ងៃទី២៧ ខែមីនា ឆ្នាំ២០២១នេះថា របបយោធា ដែលកំពុងកាន់អំណាច បានព្រមាននៅថ្ងៃសុក្រថា ក្រុមបាតុករគាំទ្រលទ្ធិប្រជាធិបតេយ្យ ពួកគេអាចនឹងត្រូវបាញ់បំបែកក្បាល ការព្រមាននេះបានធ្វើឡើង ខណៈក្រុមសកម្មជនបានអំពាវនាវឱ្យមានការបង្ហាញនូវការប្រឆាំងដ៏ធំធេងប្រឆាំងនឹងឧត្តមសេនីយ៍ក្នុងទិវាប្រដាប់អាវុធរបស់ប្រទេសនៅថ្ងៃសៅរ៍នេះ។

ការចាក់ផ្សាយតាមប៉ុស្តិ៍ទូរទស្សន៍ MRTV បាននិយាយថា« អ្នកគួរតែរៀនពីសោកនាដកម្ម នៃមរណភាពអាក្រក់ដែលអ្នកអាចមានគ្រោះថ្នាក់ ក្នុងការបាញ់ចំក្បាលនិងពីក្រោយខ្នង»។

សូមជម្រាបថា កងទ័ពបានសម្លាប់មនុស្ស ៤ នាក់បន្ថែមទៀតនៅក្នុងបាតុកម្មកាលពីថ្ងៃសុក្រ ដោយបានបន្ថែមចំនួនអ្នកស្លាប់៣២៧ នាក់ នៅក្នុងការបង្ក្រាបចាប់តាំងពីធ្វើរដ្ឋប្រហារ ប្រឆាំងនឹងរដ្ឋាភិបាលជាប់ឆ្នោតរបស់លោកស្រីអ៊ុង សានស៊ូជី កាលពីថ្ងៃទី ១ ខែកុម្ភៈ។

សម្ពាធអន្តរជាតិបានបន្តដាក់ទៅលើរបបយោធា ដោយបានការដាក់ទណ្ឌកម្មថ្មីរបស់អាមេរិកនិងអឺរ៉ុប ខណៈដែលរុស្ស៊ីបានផ្តល់ការគាំទ្រដល់យោធា ហើយបាននិយាយថា ខ្លួនចង់ពង្រឹងចំណងមិត្តភាព។

សេចក្តីរាយការណ៍បាននិយាយថា បាតុកម្មបានកើតឡើងនៅទូទាំងប្រទេសម្តងទៀតពេញមួយយប់នៅថ្ងៃសុក្រ រួមទាំងនៅតំបន់ម៉ាន់ដាឡាយ និងនៅតំបន់សាហ្គាងក៏ដូចជារដ្ឋការ៉ែននិងជិន។

យ៉ាងហោចណាស់ មានក្រុមបាតុករចំនួន ៣២០នាក់ ត្រូវបានសម្លាប់នៅក្នុងសប្តាហ៍នៃភាពវឹកវរគិតត្រឹមយប់ថ្ងៃព្រហស្បតិ៍ នេះបើយោងតាមតួលេខពីក្រុមសកម្មជនសមាគមអ្នកទោសនយោបាយ (AAPP) ។

ទិន្នន័យនេះ បានបង្ហាញថា យ៉ាងហោចណាស់ ២៥ ភាគរយនៃអ្នកទាំងនោះបានស្លាប់ដោយសារការបាញ់ប្រហារចំក្បាល ដោយបង្កើនការសង្ស័យថា ពួកគេត្រូវបានគេតម្រង់គោលដៅបាញ់សម្លាប់។

ប្រេសិតពិសេសរបស់អង្គការសហប្រជាជាតិប្រចាំនៅមីយ៉ាន់ម៉ា លោកស្រី Christine Schraner Burgener បាននិយាយថា យោធាបានប្រឆាំងនឹងសម្លាប់ពលរដ្ឋរបស់ខ្លួនឯង។

លោកស្រីបាននិយាយនៅក្នុងសេចក្តីថ្លែងការណ៍មួយថា« ស្ត្រី យុវជន និងកុមារ ស្ថិតក្នុងចំណោមអ្នកដែលត្រូវបានគេសម្លាប់»។

ប្រទេសមហាអំណាចលោកខាងលិច បានថ្កោលទោសរដ្ឋប្រហារនិងការបង្ក្រាបនោះ រុស្ស៊ីបាននិយាយថា ខ្លួនចង់ពង្រឹងទំនាក់ទំនងជាមួយយោធាមីយ៉ាន់ម៉ា។

ទីភ្នាក់ងារសារព័ត៌មាន Tass បានរាយការណ៍ថា អនុរដ្ឋមន្រ្តីក្រសួងការពារជាតិរុស្ស៊ី លោក Alexander Fomin បានជួបជាមួយមេដឹកនាំយោធា លោក Min Aung Hlaing កាលពីថ្ងៃសុក្រ ហើយបាននិយាយថា ប្រទេសមីយ៉ាន់ម៉ាគឺជាដៃគូសម្ព័ន្ធមិត្តដែលអាចទុកចិត្តបាននិងជាដៃគូយុទ្ធសាស្ត្ររបស់ទីក្រុងម៉ូស្គូ។

ទំនាក់ទំនងការពារជាតិរវាងរុស្ស៊ីនិងមីយ៉ាន់ម៉ា មានការរីកចម្រើនក្នុងប៉ុន្មានឆ្នាំថ្មីៗនេះ ដោយទីក្រុងម៉ូស្គូផ្តល់ការបណ្តុះបណ្តាលដល់ទាហានរាប់ពាន់នាក់ក៏ដូចជាការលក់អាវុធទៅឲ្យយោធាមីយ៉ាន់ម៉ា។

ការគាំទ្ររបស់រដ្ឋាភិបាលក្រុងមូស្គូ ក៏មានសារៈសំខាន់ផងដែរចំពោះរបបយោធា ខណៈ រុស្ស៊ីក៏ជាសមាជិកអចិន្រ្តៃយ៍នៃក្រុមប្រឹក្សាសន្តិសុខអង្គការសហប្រជាជាតិនិងរួមជាមួយប្រទេសចិន ដែលបានបដិសេធមិនថ្កោលទោស ផងដែរ ដែលបានរារាំងដល់សកម្មភាពរបស់អង្គការសហប្រជាជាតិ។

ដំណើរទស្សនកិច្ចនេះបានធ្វើឡើង បន្ទាប់ពីសហរដ្ឋអាមេរិកអង់គ្លេសនិងសហភាពអឺរ៉ុប បានដាក់ទណ្ឌកម្មថ្មីទៅលើក្រុមហ៊ុននិងបុគ្គលដែលជាប់ពាក់ព័ន្ធ នឹងរដ្ឋប្រហារ៕ ប្រភព៖ Reuters