រាជធានីភ្នំពេញ ៖ មានការភ្ញាក់ផ្អើលដល់សមត្ថកិច្ចចុះមកធ្វើការពិនិត្យ ខណៈប្រទះឃើញសពបុរសម្នាក់ បានធ្វើអត្តឃាតចងកសម្លាប់ខ្លួន ។
ហេតុការណ៍នេះបានកើតឡើងនៅវេលាម៉ោង១១និង១៥នាទីព្រឹកថ្ងៃទី៣ ខែមេសា ឆ្នាំ២០២៥ នៅក្នុងបន្ទប់ជួលមួយកន្លែង ស្ថិតនៅក្នុងភូមិព្រៃស្វាយ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
បើតាមការរៀបរាប់ពីប្រពន្ធក៏ដូចជាសាច់ញាតិ បានឲ្យដឹងថា ប្តីប្រពន្ធពួកគាត់ បានរៀបការជាមួយគ្នារយៈពេលជិត២០ឆ្នាំ មានកូនចំនួន០៤នាក់ ក្រោយមកប្តីបែរជាសេពគ្រឿងញៀន ងប់នឹងល្បែងស៊ីសងតាមអនឡាញ យកម៉ូតូគេមកលក់លេងល្បែងរហូតជាប់ពន្ធនាគារ១ឆ្នាំ ទើបតែចេញមកវិញបានជាង១ខែប៉ុណ្ណោះ បន្ទាប់មកក៏ចោទថាគាត់នេះមានសាហាយ ក្បត់ចិត្ត រករឿងឈ្លោះគ្នារហូត រួចកាន់រូបថតគាត់ទៅសាលាសង្កាត់ចោមចៅទី៣ ខណ្ឌពោធិ៍សែនជ័យ ដើម្បីសុំឲ្យអាជ្ញាធរជួយអន្តរាគមន៍ ហៅគាត់ជាប្រពន្ធមកជួបដោះស្រាយគ្នាផ្ដិតមេដៃលែងលះគ្នា ចែកកូន និងទ្រព្យសម្បត្តិគ្នាបញ្ចប់រឿង ទាំងដែលគាត់គ្មានសាហាយអ្វីនោះទេ និងបានគំរាមសម្លាប់គាត់ជាប្រពន្ធរហូត ចុងក្រោយយកកាំបិតដាក់លើ កគាត់ហើយនិយាយថា សម្លាប់គាត់រួចនឹងអារ ក សម្លាប់ខ្លួនឯងតាមក្រោយ ចំពោះកូនៗចង់ទៅណាក៏ទៅៗ ដោយខ្លាចស្លាប់ ទើបគាត់ជាប្រពន្ធនាំកូនៗគេចចេញពីផ្ទះទៅនៅផ្ទះម្ដាយមីង ឯបុរីពិភពថ្មី២ជាបណ្ដោះអាសន្នសិនប៉ុណ្ណោះ មិនបានរត់តាមប្រុសឡើយ ។ លុះថ្ងៃនេះ ក៏ទទួលដំណឹងថា ប្តីរបស់គាត់ចង.កសម្លាប់ខ្លួនបែបនេះតែម្តង ។
ក្រោយកើតហេតុសមត្ថកិច្ចបានធ្វើការពិនិត្យសាកសព និងប្រគល់ឲ្យសាច់ញាតិធ្វើបុណ្យតាមប្រពៃណី ៕
