អាមេរិក៖ យោងតាមការចេញផ្សាយដោយសារព័ត៌មាន Reuters នៅថ្ងៃទី០៣ ខែមីនា ឆ្នាំ២០២២ បានឲ្យដឹងថា មហាសន្និបាតអង្គការសហប្រជាជាតិ កាលពីថ្ងៃពុធ បានអនុម័តយ៉ាងលើសលប់ នូវដំណោះស្រាយដែល «ទាមទារ» រុស្ស៊ី«ភ្លាមៗ»ដកខ្លួនចេញពីអ៊ុយក្រែន នៅក្នុងការស្តីបន្ទោសដ៏ខ្លាំងក្លា ចំពោះការលុកលុយរបស់ទីក្រុងមូស្គូ ដោយប្រទេសមួយចំនួនធំនៃពិភពលោក។ បន្ទាប់ពីការជជែកដេញដោលជាវិសាមញ្ញអស់រយៈពេលជាងពីរថ្ងៃ ដែលបានឃើញឯកអគ្គរដ្ឋទូតអ៊ុយក្រែន ចោទប្រកាន់រុស្ស៊ីពីបទប្រល័យពូជសាសន៍ ប្រទេសសមាជិកចំនួន១៤១ក្នុងចំណោម ១៩៣ បានបោះឆ្នោតគាំទ្រដំណោះស្រាយមិនជាប់កាតព្វកិច្ច។
ប្រទេសចិនស្ថិតក្នុងចំណោមប្រទេសចំនួន ៣៥ ដែលបានអនុប្បវាទ ខណៈប្រទេសចំនួន ៥ គឺអេរីទ្រា កូរ៉េខាងជើង ស៊ីរី បេឡារុស និងរុស្ស៊ី បានបោះឆ្នោតប្រឆាំង។ ដំណោះស្រាយនេះ«បដិសេធ»ការឈ្លានពានអ៊ុយក្រែន «ក្នុងលក្ខខណ្ឌខ្លាំងបំផុត»និងថ្កោលទោសការសម្រេចចិត្តរបស់ប្រធានាធិបតី វ្ល៉ាឌីមៀ ពូទីន ក្នុងការដាក់កងកម្លាំងនុយក្លេអ៊ែររបស់លោកឱ្យប្រុងជើងការ។
ការបោះឆ្នោតនេះត្រូវបានអ្នកការទូតសរសើរថាជាបន្ទុះនៃលទ្ធិប្រជាធិបតេយ្យនៅក្នុងពិភពលោក ដែលស្វ័យភាពកំពុងកើនឡើងនៅក្នុងប្រទេសពីមីយ៉ាន់ម៉ា រហូតដល់វេណេហ្ស៊ុយអេឡា ហើយបានកើតឡើងនៅពេលដែលកងកម្លាំងរបស់លោកពូទីន ស៊ូទ្រាំនឹងទីក្រុងគៀវ ខណៈប្រជាជនអ៊ុយក្រែនភៀសខ្លួនដោយភ័យខ្លាច។
ក្នុងកិច្ចប្រជុំ UNGA នេះ ឯកអគ្គរដ្ឋទូតអ៊ុយក្រែនប្រចាំUN លោក Sergiy Kyslytsya បាននិយាយមុនការបោះឆ្នោតថា «ពួកគេ(រុស្ស៊ី)បានចូលមកដកហូតសិទ្ធិអ៊ុយក្រែន ខណៈពេលដែលអ៊ុយក្រែនកំពុងមានសិទ្ធិផ្ទាល់ខ្លួន»។ លោកបន្តថា រុស្ស៊ីមិនត្រឹមមកត្រួតត្រាអ៊ុយក្រែនទេ ប៉ុន្តែទង្វើនេះជាអំពើប្រល័យពូជសាសន៍។
នៅក្រៅកិច្ចប្រជុំនោះ ទីក្រុងវ៉ាស៊ីនតោនបានផ្តោតគោលដៅលើជនជាតិរុស្ស៊ីដែលធ្វើការនៅអង្គការសហប្រជាជាតិ ហើយព្រមានចោទប្រកាន់ពីបទចារកម្ម និងទាមទារឱ្យមានការបណ្តេញចេញពីការងារ។ ជាពិសេស ប្រធានាធិបតីអាម៉េរិកលោក បូ បៃដិន បានអះអាងកាលពីថ្ងៃអង្គារនៅក្នុងសុន្ទរកថាអំពីស្ថានការណ៍ប្រទេសរបស់លោកថា «លោកពូទីន ប៉ាន់ស្មានមិនដល់ចំពោះការឆ្លើយតបចំពោះការលុកលុយនេះ»។ លោកបន្ថែមថា «លោកពូទីន បានបដិសេធកិច្ចខិតខំប្រឹងប្រែងខាងការទូត...ហើយលោកគិតថារុស្ស៊ីអាចបំបែកសម្ព័ន្ធមិត្តនៅទីនេះបាន»។
ទន្ទឹមនឹងនេះ ឯកអគ្គរដ្ឋទូតបេឡារុសលោក វ៉ាឡេនទីន រី ប៉ាកូវ (Valentin Rybakov) បានរិះគន់ទណ្ឌកម្មដែលដាក់ដោយលោកខាងលិចមកលើរុស្ស៊ីថាជា «ឧទាហរណ៍ដ៏អាក្រក់បំផុតនៃអំពើភេរវកម្មសេដ្ឋកិច្ច និងហិរញ្ញវត្ថុសកល»។
សូមរំឮកថា កម្ពុជាក៏ដូចជាប្រទេសសមាជិកអាស៊ានទាំង៧ទៀត បោះឆ្នោតគាំទ្រសេចក្ដីសម្រេចឱ្យរុស្ស៊ីដកទ័ព។ រីឯវៀតណាមនិងឡាវដែលជាអតីតសម្ព័ន្ធមិត្តសូវៀត បានធ្វើអនុបវាទសេចក្ដីសម្រេចនេះ៕
ប្រភព៖ Reuters
