មូស្គូ៖ សារព័ត៌មាន Al Jazeera ចេញផ្សាយនៅថ្ងៃទី០៥ ខែមីនា ឆ្នាំ២០២២នេះថា រុស្ស៊ី បានប្រកាសពីដាក់ចេញបទឈប់បាញ់មួយ នៅក្នុងប្រទេសអ៊ុយក្រែន ក្នុងគោលបំណងបើកច្រករបៀងមនុស្សធម៌មួយ សម្រាប់ជនស៊ីវិល។
ក្រសួងការពារជាតិរុស្ស៊ី បាននិយាយថា «ថ្ងៃនេះ គឺត្រូវនឹងថ្ងៃទី៥ ខែមីនា នៅវេលាម៉ោង១០ព្រឹកនេះ (ម៉ោងក្នុងទីក្រុងម៉ូស្គូ) ខាងភាគីរុស្ស៊ីបានសម្រេចប្រកាសដាក់ចេញបទឈប់បាញ់ និងបើកច្រករបៀង មនុស្សធម៌ សម្រាប់ឱ្យជនស៊ីវិលចាកចេញពីទីក្រុង ម៉ារីយូប៉ូល (Mariupol) និងទីក្រុងវ៉ុលណូវ៉ាខា (Volnovakha)»។
ក្រសួងការពារជាតិរុស្ស៊ី បន្ថែមថាការបង្កើតច្រករបៀងមនុស្សធម៌ ត្រូវបានបង្កើតឡើងក្រោមកិច្ចព្រមព្រៀងជាមួយអ៊ុយក្រែន ហើយវា នឹងត្រូវអនុវត្តចាប់ម៉ោង ៦៖០០នាទីព្រឹកម៉ោងសកល ឬត្រូវនឹងម៉ោង៨៖០០នាទីព្រឹកថ្ងៃសៅរ៍នេះ (ម៉ោងនៅអ៊ុយក្រែន)។
ជាមួយគ្នាដែរ កិច្ចចរចាជុំទី៣ រវាងអ្នកតំណាងនៃប្រទេសទាំង២ ក៏គ្រោងនឹងជួបគ្នាឆាប់ៗនេះដែរ នៅថ្ងៃសៅរ៍ ឬនៅថ្ងៃអាទិត្យចុងសប្ដាហ៍នេះ។ ប៉ុន្តែពាក់ព័ន្ធនឹងបទឈប់បាញ់ដែលរុស្ស៊ីបានប្រកាស ខាងភាគីអ៊ុយក្រែន មិនទាន់ធ្វើអត្ថាធិប្បាយអ្វីទេ៕
