សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជា បានគូសបញ្ជាក់សារជាថ្មីថា ជំហរបស់កម្ពុជាលើបន្ទាត់នយោបាយការបរទេស កម្ពុជាមិនគាំទ្រការឈ្លានពានណាមួយពីប្រទេសមួយទៅកាន់ប្រទេសមួយនោះទេ ហើយនេះជាគោលជំហរដាច់ណាត់របស់កម្ពុជា។
ក្នុងពិធីសម្ពោធបើកឱ្យប្រើប្រាស់ជាផ្លូវការផ្លូវជាតិលេខ២១ ដែលមានប្រវែងសរុប ៦៣,៦ គីឡូម៉ែត្រ ចាប់ពីរង្វង់មូលក្រុងតាខ្មៅ ទៅដល់ស្ពានជ្រៃធំ ស្រុកកោះធំ (ព្រំដែនកម្ពុជា-វៀតណាម) ដែលស្ថាបនាឡើងវិញក្រោមឥណទានសម្បទានពីរដ្ឋាភិបាលនៃសាធារណរដ្ឋកូរ៉ មានតម្លៃជាង ៦០លានដុល្លារសហរដ្ឋអាមេរិក នាព្រឹកថ្ងៃទី ២៣ ខែមីនា ឆ្នាំ២០២២ នៅខេត្តកណ្ដាល សម្ដេចតេជោ ហ៊ុន សែន បានថ្លែងថា “ព្រឹកមិញនេះមានការផ្ញើរមកសុំយោបល់ថាតើគួរបោះឆ្នោតការគាំទ្រ ឬបោះឆ្នោតអនុប្បវាទ ឬបោះឆ្នោតប្រឆាំង។ ខ្ញុំផ្ញើរសំឡេងទៅវិញថាអត់ទេគឺបោះឆ្នោតដូចដែលយើងធ្វើនៅអង្គការសហប្រជាជាតិ អីចឹង ចំពោះបញ្ហារុស្ស៊ី និងអ៊ុយក្រែន”។ សម្ដេចតេជោបានបញ្ជាក់ថា រឿងបញ្ហារុស្ស៊ី និងអ៊ុយក្រែនវាពិបាកសាំញាំណាស់ ហើយយើងក៏ត្រូវគិតអំពីគោលជំហរប៉ុន្ដែក៏មានប្រទេសខ្លះមកបបួលយើងបោះឆ្នោតអនុប្បវាទ ហើយកម្ពុជាត្រូវបោះឆ្នោតគាំទ្រ ឬបោះឆ្នោតអនុប្បវាទ ឬបោះឆ្នោតប្រឆាំង ពីព្រោះមានអ្នកបបួលឱ្យកម្ពុជាបោះឆ្នោតអនុប្បវាទលើបញ្ហារុស្ស៊ី និងអ៊ុយក្រែន។សម្ដេចតេជោបានថ្លែងបញ្ជាក់ថា “យើងមិនគាំទ្រឱ្យមានការបំបែករដ្ឋ យើងប្រឆាំងនឹងការប្រើប្រាស់កម្លាំង ឬគម្រាមការប្រើប្រាស់កម្លាំង”។
សម្ដេចតេជោនាយករដ្ឋមន្រ្ដីបានដាក់ចេញសេចក្ដីសម្រេច ទៅគ្រប់ទីកន្លែងទាំងអស់ ឱ្យតែមានពាក់ព័ន្ធនឹងសង្រ្គាមរុស្ស៊ី និងអ៊ុយក្រែន កម្ពុជាប្រឆាំងនឹងការឈ្លានពានតែម្ដង ប្រឆាំងនឹងការប្រើប្រាស់កម្លាំង ហើយផ្ដល់នូវការគាំទ្រទាំងឡាយដែលនាំមកនូវសន្ដិភាព ជាពិសេសកម្ពុជាក៏មិនយកសាំងយកទៅចាក់លើភ្លើងដែរ។ សម្ដេចតេជោបានអះអាងថា កម្ពុជាមានភាពជាតំណាងគឺចំនួន១១សំឡេង តែមានគេបបួលឱ្យបោះឆ្នោតអនុប្បវាទ តែកម្ពុជាបោះឆ្នោតគាំទ្រទាំងអស់ពីព្រោះរឿងរុស្ស៊ី និងអ៊ុយក្រែន មិនមែនជារឿងតូចតាចនោះទេ រឿងនេះគឺបង្កើតឡើងនូវទម្លាប់អាក្រក់លើពិភពលោក អ្នកខ្លាំងគឺវ៉ៃអ្នកខ្សោយ។ សម្ដេចតេជោបានលើកឡើងថា “អីចឹងថ្ងៃក្រោយអ្នកខ្លាំងវ៉ៃអ្នកខ្សោយ ហើយវ៉ៃមកលើយើង អ្នកណាជួយយើងទៀត បើយើងមិនគាំទ្រនោះហើយកម្ពុជាប្រកាន់គោលការណ៍មួយជាក់លាក់”។
សម្ដេចតេជោបានសង្កត់ធ្ងន់ថា ឥឡូវនេះសង្រ្គាមរវាងរុស្ស៊ី និងអ៊ុយក្រែនគឺធ្វើឱ្យចលាចលដល់ស្រុកខ្មែរ គឺចលាចលរឿងសាំងឡើងថ្លៃ ហើយដែលគ្មាននរណាគេចរួចពីបញ្ហានោះទេ។ សម្ដេចតេជោបានថ្លែងបន្ថែមថា “ថាអាកូវីដគឺអត់មានមនុស្សគេចរួច ប៉ុន្ដែកូវីដ វាអន្ដរាយស្ទើរតែតិចជាងឥទ្ធិពលបញ្ហាសង្រ្គាមរវាងរុស្ស៊ី និងអ៊ុយក្រែន ពីព្រោះឥឡូវចាប់ផ្ដើមផលប៉ះពាល់របស់វារីករាលដាលពេញពិភពលោកហើយ រឿងនេះធ្ងន់ធ្ងរណាស់ ប្រសិនបើមិនប្រញាប់បញ្ចប់ទេនោះ មិនដឹងជាពិភពលោកដើរដល់ណា តើពិភពលោកដើរដល់សង្រ្គាមលោកលើកទី៣ ឬអត់ ឬដើរដល់សង្គ្រាមនុយក្លេអ៊ែរ ឬអត់”៕ ប្រភព៖ AKP
