ខេត្តកណ្តាល ៖ យោងតាមផេក ផ្លូវការរបស់ BTV Cambodia បានឲ្យដឹងថា អ្នកភូមិឈើទាល មានការភ្ញាក់ផ្អើលយ៉ាងខ្លាំង ហើយពេលនេះ ប្រជាពលរដ្ឋយ៉ាងច្រើនកុះករ បាននាំគ្នាទៅមើល ខណៈដើមឈើទាលដ៏ធំសម្បើមមួយដើម បានផុសមកជាប់សំណាញ់អ្នកនេសាទ ហើយត្រូវពួកគាត់ទាញឡើង តែមិនរួច។

បើតាមចាស់ទុំនៅក្នុងភូមិឈើទាល ឃុំឈើទាល ស្រុកកៀនស្វាយ មួយចំនួន បានអះអាងថា៖ គឺដើមឈើនេះហើយ ដែលមានជាប់ពាក់ព័ន្ធនឹងឈ្មោះភូមិ «ឈើទាល» នេះតែម្តង។

អ្វីដែលកាន់តែភ្ញាក់ផ្អើលនោះ ពេលនេះ រថយន្តស្ទូច២គ្រឿង ពុំទាន់អាចស្ទូចដើមឈើទាលដ៏ធំ១ដើមនេះ ចេញពីទឹកឡើងគោកបាននៅឡើយ។

អ្នកមានអបិយជំនឿ នៅភូមិនោះ ក៏បានរៀបចំពិធីសែនព្រេន នៅទីនេះ ព្រោះគេសង្កេតឃើញនៅវេលាថ្ងៃត្រង់ម៉ោង១១ ថ្ងៃទី១២ ខែឧសភា ឆ្នាំ២០២២នេះ ក៏ឃើញមានមនុស្សម្នាក់ មានវិញ្ញាណចូលសណ្ឋិតភ្លាមៗ ឬក៏អាចនិយាយថា ថាចូលរូប និងលើមេឃឃើញ«ថ្ងៃបាំងឆ័ត្រ»ផងដែរ ៕