រាជធានីភ្នំពេញ៖ យោងតាមផេកស្នងការដ្ឋាននគរបាលរាជធានីភ្នំពេញ បានបង្ហោះនៅវេលាម៉ោង ៦ និង១៩នាទីយប់ ថ្ងៃទី៣ ខែមេសា ឆ្នាំ២០២១នេះ បញ្ជាក់ថា ថ្ងៃទី៣ នៃការចុះអនុវត្តបម្រាមគោចរហាមធ្វើដំណើរបណ្តោះអាសន្ន ចាប់ពីម៉ោង ០៨:០០នាទីយប់ ដល់ម៉ោង ០៥:០០នាទីភ្លឺ នៅភូមិសាស្ត្ររាជធានីភ្នំពេញ ។
ក្នុងនោះ ការអនុវត្តវិធានការកាលពីយប់ថ្ងៃទី០២ ខែមេសា ឆ្នាំ២០២១ បានបង្ហាញឲ្យឃើញថា ប្រជាពលរដ្ឋភាគច្រើនបានដឹងអំពីបម្រាមគោចរនេះ ហើយបានចូលរួមគោរព និងសហការបានយ៉ាងល្អដោយមិនចេញពីផ្ទះបើមិនមានការចាំបាច់ ។
ម្យ៉ាងវិញទៀតគឺមានតែប្រជាពលរដ្ឋចំនួនតិចតួចបំផុតដែលល្មើសនឹងបម្រាមនេះ ដោយសមត្ថកិច្ចបានធ្វើការឃាត់ម៉ូតូចំនួន ៦៥គ្រឿង និងរថយន្តចំនួន ៨គ្រឿង យកមករក្សាទុករហូតដល់១៤ថ្ងៃ ទើបប្រគល់ជូនម្ចាស់វិញ ។
ចាប់ពីយប់នេះទៅ ស្នងការដ្ឋាននគរបាលរាជធានីភ្នំពេញ សង្ឃឹមជឿជាក់ថា បងប្អូនប្រជាពលរដ្ឋនឹងអនុវត្តតាមបម្រាមគោចរ ជាពិសេសចំនួនអ្នកល្មើសនឹងថយចុះពីមួយថ្ងៃទៅមួយថ្ងៃ ដើម្បីចូលរួមបង្ការ និងទប់ស្កាត់ការឆ្លងរាលដាលវីរុសកូវី១៩ ៕
