AKP ភ្នំពេញ ថ្ងៃទី១៩ ខែឧសភា ឆ្នាំ២០២២--ឯកឧត្តម Narendra Modi នាយករដ្ឋមន្រ្តី នៃសាធារណរដ្ឋឥណ្ឌាបានមាន ប្រសាសន៍ថា ឥណ្ឌា នឹងផ្ដល់នូវឥណទានចំនួន ១ ពាន់លានដុល្លារសម្រាប់ប្រទេសកម្ពុជា ក្នុងការប្រើប្រាស់សម្រាប់ កិច្ចសហប្រតិបត្តិការមេគង្គ-គង្គា។ នេះបើតាមការឱ្យដឹងរបស់ឯកឧត្ដម កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បន្ទាប់ពីជំនួបពិភាក្សាការងាររបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងឯកឧត្តម Narendra Modi នាយករដ្ឋមន្រ្តី នៃសាធារណរដ្ឋឥណ្ឌា តាមរយៈប្រព័ន្ធវីដេអូ ពីគេហដ្ឋាននាទីក្រុងតាខ្មៅ ខេត្តកណ្តាល នាល្ងាចថ្ងៃទី១៨ ខែឧសភា ឆ្នាំ២០២២។នៅក្នុងជំនួបនោះ ឯកឧត្ដមនាយករដ្ឋមន្រ្តីឥណ្ឌា បានសម្ដែងនូវការកាន់ទុក្ខចំពោះការបាត់បង់បងប្រុសរបស់សម្ដេចតេជោ នាយករដ្ឋមន្ត្រី ហ៊ុន សែន ហើយឯកឧត្ដមបានគូសបញ្ជាក់ថា ឥណ្ឌានិងកម្ពុជាមានទំនាក់ទំនងយូរលង់មកហើយតាំងពី សម័យបុរាណមកម្ល៉េះ គឺមានទំនាក់ទំនងខាងវប្បធម៌។ ឯកឧត្ដមក៏បានអបអរសាទរចំពោះកម្ពុជា ដែលបានទទួលធ្វើជា ប្រធានអាស៊ាននៅក្នុងឆ្នាំ២០២២នេះ។ ឯកឧត្ដមបានគូសបញ្ជាក់បន្ដថា នៅក្នុងគោលនយោបាយឆ្ពោះទៅខាងកើតរបស់ ប្រទេសឥណ្ឌាបានចាត់ទុកកម្ពុជាជាដៃគូដ៏សំខាន់។
ជាការឆ្លើយតបសម្ដេចតេជោ ហ៊ុន សែន បានអរគុណចំពោះនាយករដ្ឋមន្ត្រីឥណ្ឌាដែលបានចូលរួមរំលែកទុក្ខចំពោះការបាត់ បង់បងប្រុសរបស់សម្ដេច។ សម្តេចតេជោក៏បានគូសបញ្ជាក់ដែរថា ចំពោះគោលនយោបាយឆ្ពោះទៅទិសខាងកើតរបស់ ប្រទេសឥណ្ឌានេះ វាត្រឹមត្រូវជាមួយនឹងគោលនយោបាយរបស់អាស៊ានផងដែរ ដែលបានចាត់ទុកឥណ្ឌាជាដៃគូយុទ្ធសាស្ត្រ សំខាន់មួយ។ សម្តេចតេជោ ហ៊ុន សែន ក៏បានអបអរសាទរចំពោះឥណ្ឌា ដែលបានទទួលជោគជ័យក្នុងការប្រយុទ្ធប្រឆាំង នឹងគ្រប់គ្រងកូវីដ១៩ ដែលតាំងពីការឆ្លងច្រើន រហូតមកដល់ពេលនេះមិនមានការឆ្លង។ សម្តេចតេជោនាយករដ្ឋមន្រ្ដីក៏បានអរគុណប្រទេសឥណ្ឌាដែលបានផ្ដល់វ៉ាក់សាំងចំនួន ៣២៥ ០០០ ដូសដល់កម្ពុជា។សម្ដេចតេជោបានគូសបញ្ជាក់ទៀតថា វាជាវ៉ាក់សាំងដែលឆ្លុះបញ្ចាំងពីការចូលរួមក្នុងសាមគ្គីភាព ហើយធ្វើឱ្យកម្ពុជាទទួល បានជោគជ័យរហូតមកដល់ពេលនេះដែលមកដល់ពេលនេះកម្ពុជាបានចាក់វ៉ាក់សាំងជូនប្រជាពលរដ្ឋចំនួន ៩៣,៦ ភាគរយ ហើយបានធ្វើឱ្យកម្ពុជាអាចបើកប្រទេសឡើងវិញកាលពីខែវិច្ឆិកា ឆ្នាំ២០២១ ។ ទន្ទឹមនេះ រាជរដ្ឋា ភិបាលកម្ពុជានៅតែ បន្តយុទ្ធនាការថ្នាក់ជាតិចាក់វ៉ាក់សាំងដល់ប្រជាពលរដ្ឋកម្ពុជា។ សម្តេចតេជោក៏បានជម្រាបជូននាយករដ្ឋមន្រ្តីឥណ្ឌាថា ក្នុងថាងរយៈពេល១១ថ្ងៃជាប់គ្នាមកនេះ ប្រទេសកម្ពុជាមិនមានការឆ្លងកូវីដ១៩ឡើយ។ សម្ដេចតេជោក៏បានអរគុណ នាយករដ្ឋមន្ត្រីឥណ្ឌា ចំពោះការគាំទ្រក្នុងការប្រយុទ្ធប្រឆាំងកូវីដ១៩នេះ។ សម្ដេចតេជោបានគូសបញ្ជាក់ផងដែរថា ចំពោះ កិច្ចសហប្រតិបត្តិការដ៏ល្អដែលគ្រប់ដណ្ដប់លើវិស័យជាច្រើន រួមមានវិស័យសេដ្ឋកិច្ច នយោបាយ វប្បធម៌ ជាពិសេសទៀត ក្នុងការជំរុញការប្រាស្រ័យទាក់ទងរវាងប្រជាជននិងប្រជាជននៃប្រទេសទាំងពីរ។ សម្ដេចតេជោបានឱ្យដឹងដែរថា ឥឡូវនេះ ភាគីទាំងពីរ កម្ពុជា និងឥណ្ឌាកំពុងតែស្វែងរកពេលវេលាស័ក្តិសមនៅក្នុងព្រះរាជទស្សនកិច្ចរបស់ព្រះមហាក្សត្រ ព្រះបាទ សម្ដេចព្របរមនាថ នរោត្តម សីហមុនី ដែលគ្រោងនឹងយាងទៅបំពេញទស្សនកិច្ចនៅប្រទេសឥណ្ឌាក្នុងឆ្នាំ២០២៣ ខាងមុខ ព្រមទាំងទស្សនកិច្ចរបស់ឯកឧត្ដម ហ៊ុន ម៉ាណែត មេបញ្ជាការកងទ័ពជើងគោកកម្ពុជា ដែលនឹងទៅទស្សនកិច្ច ក្នុងឆ្នាំ២០២២ នេះ ដើម្បីចូលរួមពង្រីកទំនាក់ទំនងទ្វេភាគីជាពិសេស ក្នុងការប្រារព្ធខួបទី៧០នៃទំនាក់ទំនងការទូតរវាងប្រទេសទាំងពីរ។ក្នុងឱកាសនោះដែរ សម្តេចតេជោក៏បានអរគុណចំពោះឥណ្ឌា ដែលបានចូលរួមផ្ដល់នូវអណ្ដូងទឹកប្រមាណជា ៥០០អណ្ដូង ក៏ដូចជាការផ្ដល់នូវសម្ភារផ្សេងៗទៀតដល់ប្រទេសកម្ពុជាដែលជាជំនួយឥតសំណង។ សម្ដេចតេជោបានលើកឡើងផងដែរ ពាក់ព័ន្ធនឹងទំហំពាណិជ្ជកម្មរវាងប្រទេសកម្ពុជានិងឥណ្ឌា ថ្វីត្បិតមានការធ្លាក់ចុះនៅសម័យកាលកូវីដ-១៩ ប៉ុន្តែនៅក្នុងឆ្នាំ២០២១ មានការកើនឡើងប្រមាណ៣០០ លានដុល្លារ ។ សម្ដេចតេជោក៏បានស្នើដល់ប្រទេសឥណ្ឌា២ចំណុចក្នុងនោះ ទី១. នៅក្នុងការជំរុញនូវការបញ្ចប់ នីតិវិធីបច្ចេកទេសបានឆាប់ដើម្បីពន្លឿនលើការចុះហត្ថលេខានៃកិច្ចព្រមព្រៀង ពាណិជ្ជកម្មសេរីរវាងកម្ពុជានិងឥណ្ឌានិងពន្លឿនទៅលើការចរចាដើម្បីបញ្ចប់នូវសន្ធិសញ្ញាវិនិយោគទ្វេភាគីរវាងកម្ពុជា និងឥណ្ឌា ដើម្បីឈានទៅចុះហត្ថលេខាឱ្យបានឆាប់ផងដែរ។
លើសពីនេះទៀតសម្ដេចតេជោនាយករដ្ឋមន្រ្ដីក៏បានលើកឡើងអំពីវិស័យទេសចរណ៍ ដែលសម្ដេចបានស្នើសុំឱ្យមាន ការហោះហើរត្រង់ពីឥណ្ឌាមកភ្នំពេញ និងពីឥណ្ឌាមកខេត្តសៀមរាប ក្នុងការជំរុញធ្វើយ៉ាងណាឱ្យទេសចរណ៍មានការកើន ឡើងរវាងប្រទេសទាំងពីរ ហើយជាពិសេសទៀតដោយសារកម្ពុជាឥឡូវនេះបានបើកចំហសម្រាប់ទេសចរណ៍ដែលបាន ចាក់វ៉ាក់សាំងគ្រប់គ្រាន់ហើយនោះ ដោយពុំបានទាមទារឱ្យមានការធ្វើតេស្តPCR ឬធ្វើតេស្តរហ័សពេលមកដល់ជាដើម ដូច្នេះក្នុងន័យនេះសម្តេចបានស្នើសុំឱ្យឥណ្ឌាជួយជំរុញការងារនេះ។ ចំពោះកិច្ចសហប្រតិបត្តិការពហុភាគី សម្ដេចតេជោ បានមានប្រសាសន៍ថា ចំពោះវឌ្ឍនភាពនៃកិច្ចប្រតិបត្តិការក្នុងក្របខណ្ឌទំនាក់ទំនងដៃគូសន្ទនា អាស៊ាននិងឥណ្ឌាដោយកម្ពុជាស្វាគមន៍ការកំណត់យកឆ្នាំ២០២២នេះ ជាឆ្នាំមិត្តភាពអាស៊ាន-ឥណ្ឌា ដែលបានឯកភាពគ្នាលើកិច្ចប្រជុំកំពូល អាស៊ាន- ឥណ្ឌាលើកទី១៩ នៅក្នុងឆ្នាំ២០២១កន្លងទៅនេះ ជាពិសេស ដើម្បីរម្លឹកខួបអនុស្សាវរីយ៍លើកទី៣០នៃទំនាក់ ទំនងដៃគូសន្ទនា អាស៊ាន-ឥណ្ឌាកន្លងមកនេះ ហើយកម្ពុជាទន្ទឹងរង់ចាំក្នុងការប្រារព្ធ និងអនុវត្តន៍សកម្មភាពដើម្បីអបអរសាទរនៅក្នុងព្រឹត្តិការណ៍ដ៏សំខាន់នេះ។ សម្តេចតេជោក៏បានគូសបញ្ជាក់បន្ថែមផងដែរថា កម្ពុជាបញ្ជាក់ពីសារៈសំខាន់នៃ ការអនុវត្តគម្រោងផ្លូវល្បឿនលឿនត្រីភាគីឥណ្ឌា មីយ៉ាន់ម៉ាថៃ នឹងការពង្រីក មកកាន់ប្រទេសកម្ពុជា ឡាវ និងវៀតណាមផងដែរ ។
ជាមួយគ្នានេះ សម្ដេចតេជោ ហ៊ុន សេន បានវាយតម្លៃខ្ពស់ចំពោះការចូលរួមវិភាគទានរបស់ឥណ្ឌាចំនួន ១លានដុល្លារដល់ អាស៊ាន ឆ្លើយតបជាមួយនឹងកូវីដ-១៩ ហើយកម្ពុជាក៏សូមលើកទឹកចិត្តដល់ឥណ្ឌា ឱ្យបន្តគាំទ្រប្រព័ន្ធសុខាភិបាល សាធារណៈជាតិរបស់កម្ពុជាជាពិសេសការកសាង សមត្ថភាពអ្នកជំនាញសុខាភិបាលផងដែរ។ សម្ដេចតេជោក៏បានអរគុណយ៉ាងជ្រាលជ្រៅចំពោះជំនួយដែលប្រទេសឥណ្ឌាបានផ្ដល់ឱ្យកម្ពុជាតាមរយៈគម្រោង ទទួលផលឆាប់រហ័សក្រោមគំនិត ផ្ដួចផ្ដើមនៃកិច្ចសហប្រតិបត្តិការមេគង្គ-គង្គា លើវិស័យកសិកម្ម បរិស្ថាន សុខាភិបាល ការអប់រំ ការអភិវឌ្ឍជនបទ ការលើក កម្ពស់សិទ្ធិស្ត្រី និងវប្បធម៌។
ដូច្នេះសម្ដេចតេជោស្នើសុំឱ្យឥណ្ឌាបន្តការគាំទ្រសំណើគម្រោងឆាប់ទទួលបានផលរបស់កម្ពុជាបន្ថែមទៀតដល់បណ្ដាឆ្នាំខាងមុខ។ សម្ដេចតេជោនាយករដ្ឋមន្ត្រីក៏បានគូសបញ្ជាក់ អំពីការងារដែលកម្ពុជាបានធ្វើនៅក្នុងនាមជាប្រធានអាស៊ាន ជាពិសេស នៅក្នុងការជួយដល់ប្រទេសមីយ៉ាន់ម៉ា ដោយកម្ពុជាខិតខំក្នុងការជួយប្រទេសមីយ៉ាន់ម៉ាកុំឱ្យធ្លាក់ទៅក្នុងសង្គ្រាមស៊ីវិល ហើយសម្ដេចបានគូសបញ្ជាក់ផងដែរថាសម្ដេចបានបានអញ្ជើញ ទៅទស្សនកិច្ចនៅមីយ៉ាន់ម៉ានៅថ្ងៃទី០៧-០៨ ខែមករា ២០២២ និងបានជួបជាមួយឯកឧត្តម មីន អោងឡាំង ចំនួន២លើក តាមវីដេអូ។ ទន្ទឹមនេះ ក៏មានទស្សនកិច្ចរបស់ឯកឧត្តម ឧបនាយករដ្ឋមន្រ្ដី ប្រាក់ សុខុន ដែលជាប្រេសិតពិសេសរបស់ប្រធានអាស៊ានទៅទស្សនកិច្ចនៅមីយ៉ាន់ម៉ា ហើយបន្ទាប់មកមានកិច្ចប្រជុំពិគ្រោះយោបល់ក្នុងការផ្ដល់ជំនួយដល់មីយ៉ាន់ម៉ាដែលជាជំនួយមនុស្សធម៌។
សម្តេចតេជោក៏បានអញ្ជើញឯកឧត្តមនាយករដ្ឋមន្ត្រីឥណ្ឌាមកទស្សនកិច្ចនៅប្រទេសកម្ពុជា មុនពេលមានកិច្ចប្រជុំកំពូល អាស៊ាន និងកិច្ចប្រជុំពាក់ព័ន្ធ ឬនៅពេលវេលាដែលយើងរៀបចំកិច្ចប្រជុំកំពូល នៅក្នុងខែវិច្ឆិកាឆ្នាំ២០២២។
ឯកឧត្តម Narendra Modi នាយករដ្ឋមន្រ្តី នៃសាធារណរដ្ឋឥណ្ឌា បានមានប្រសាសន៍ថា យើងពិតជារីករាយដែលអាចជួយ កម្ពុជា បាន ហើយកម្ពុជាជាប្រទេសទី១នៅក្នុងក្របខណ្ឌនេះដែលទទួលបានវ៉ាក់សាំងពីប្រទេសឥណ្ឌា ឯកឧត្ដម នាយករដ្ឋមន្ត្រីបានគូសបញ្ជាក់ផងដែរថាឯកឧត្ដមពិតជារីករយដែលឮថាកម្ពុជាមិនមានករណី ឆ្លងកូវីដ-១៩ ក្នុងរយៈពេល១១ថ្ងៃមកនេះ។ ឯកឧត្ដមក៏បានគូសបញ្ជាក់ផងដែរថា នៅពេលនេះឥណ្ឌាបានជួយផ្ដល់វ៉ាក់សាំងនេះទៅដល់ប្រមាណ ១០០ប្រទេស ហើយក៏បានចូល រួមបណ្ដុះបណ្ដាលមន្ត្រីរបស់រដ្ឋាភិបាលកម្ពុជាប្រមាណជាង ២ ០០០ នាក់ ជាពិសេសនៅ ក្នុងការបណ្ដុះបណ្ដាលគ្រប់វិស័យខុសៗគ្នា ហើយថ្មីៗនេះ រដ្ឋាភិបាលឥណ្ឌានឹងផ្ដល់អាហារូបករណ៍ចំនួន ១ ០០០ កន្លែងទៀតសម្រាប់វិស័យ IT ក្នុងការបណ្ដុះបណ្ដាលប្រជាពលរដ្ឋមកពីប្រទេសអាស៊ាន ។
ឯកឧត្ដមក៏បានគូសបញ្ជាក់ពាក់ព័ន្ធនឹងគម្រោងផ្លូវហាយវេត្រីភាគី ឥណ្ឌា មីយ៉ាន់ម៉ា ថៃ ដែលបន្តខ្សែភ្ជាប់មកប្រទេសកម្ពុជា។ នៅក្នុងគម្រោងនេះពិតជាសមស្របជាមួយនឹងផែនការមេក្នុងការតភ្ជាប់មកអាស៊ាន។ ឯកឧត្ដមបានបញ្ជាក់ថាឥណ្ឌានិង ផ្ដល់នូវឥណទានចំនួន ១ ០០០ លានដុល្លារសម្រាប់ប្រទេសកម្ពុជាក្នុងការប្រើប្រាស់សម្រាប់កិច្ចសហប្រតិបត្តិការមេគង្គ-គង្គា។ ឯកឧត្ដមបានគូសបញ្ជាក់ទៀតថា កម្ពុជាគឺអាចបានទទួលផលប្រយោជន៍ពីគម្រោងឆាប់រហ័សជាគម្រោងផង តាមរយៈអាហារូបករណ៍ផងដែរ ហើយកន្លងមកនេះ ឥណ្ឌាក៏មានបេក្ខភាពក្នុងក្របខណ្ឌអន្តរជាតិជាពិសេស ក្នុងក្របខ័ណ្ឌ អង្គការសហប្រជាជាតិ ជាពិសេស អរគុណកម្ពុជាដែលគាំទ្រដល់បេក្ខភាពរបស់ ប្រទេសឥណ្ឌាជាសមាជិកអចិន្ត្រៃយ៍នៃក្រុមប្រឹក្សាអង្គការសហប្រជាជាតិនៅក្នុងក្របខណ្ឌកំណែទម្រង់នេះ។ ចំពោះបញ្ហាអន្តរជាតិ ឯកឧត្ដមនាយករដ្ឋមន្រ្ដីឥណ្ឌា បានគូសបញ្ជាក់ថា ពិតជាមានសារៈសំខាន់ណាស់ ដែលធ្វើយ៉ាងណាគាំទ្រដល់ប្រទេសមីយ៉ាន់ម៉ា ដែលជាប្រទេសភូមិផង របងជាមួយប្រទេសឥណ្ឌា ឱ្យមានសន្តិភាព ស្ថិរភាព និងការអភិវឌ្ឍ។ ឯកឧត្ដមក៏បានគូសបញ្ជាក់ដែរថា ឯកឧត្ដមពិតជាគាំទ្រនៃតួនាទីជាប្រធានអាស៊ានផង គាំទ្រមជ្ឈភាពអាស៊ានផងនិងគាំទ្រការឯកភាពផ្ទៃ ក្នុងរបស់អាស៊ានផងក្នុង ការដើរតួនាទីសំខាន់ជាពិសេសទៀត ឯកឧត្ដមបានគូសបញ្ជាក់ទៀតថា ឯកឧត្ដមបានព្យាយាមចូលរួម ចំណែកក្នុងការ សន្ទនារកដំណោះស្រាយរវាងអ៊ុយក្រែននិងរុស្ស៊ី ដោយឯកឧត្ដមបានជួបសន្ទនាជាមួយប្រធានាធិបតីទាំងពីរ រុស្ស៊ីនិង អ៊ុយក្រែនកន្លងមកនេះ ដើម្បីធ្វើយ៉ាងម៉េចឱ្យស្ថានភាពនេះមករកសន្តិភាពវិញ។
នៅក្នុងបញ្ហាសមុទ្រចិនខាងត្បូង ឯកឧត្ដមនាយករដ្ឋមន្រ្ដីឥណ្ឌាចាត់ទុកថា សមុទ្រចិនខាងត្បូងគឺជាសមុទ្រដែលមាន សារៈសំខាន់ណាស់ ជាពិសេសធ្វើយ៉ាងណាឱ្យមានសេរី បើកចំហនិងផ្អែកទៅលើច្បាប់អន្តរជាតិ។ ឯកឧត្ដមក៏បាន គូសបញ្ជាក់ដែរថា ឯកឧត្ដមរំពឹងទុកថានឹងមកទស្សនកិច្ចនិងចូលរួមកិច្ចប្រជុំនៅក្នុងខែវិច្ឆិកាឆ្នាំ ២០២២ខាងមុខនេះ។
សម្ដេចតេជោ ហ៊ុន សែន បានថ្លែងអំណរគុណដល់លោកនាយរដ្ឋមន្ត្រីឥណ្ឌា និងស្វាគមន៍នូវចំណុចទាំងឡាយដែលលោក បានលើកឡើង។ សម្ដេចតេជោមានការជឿជាក់ថា ឥណ្ឌាអាចដើរតួនាទីសមស្របក្នុងការចរចារវាងភាគីទាំងពីរ អ៊ុយក្រែន និងរុស្ស៊ី ។ សម្ដេចតេជោក៏បានបន្ថែមដែរថា សម្ដេចចង់ឃើញដំណោះស្រាយរវាងរុស្ស៊ី-អ៊ុយក្រែនឱ្យបានឆាប់ផងដែរ ដោយសារវាមានផលប៉ះពាល់ដល់សកលលោកជាពិសេសលើវិស័យសន្តិសុខស្បៀងនិងថាមពល ដែលប៉ះពាល់ដល់ប្រទេសទាំងអស់។
សម្ដេចតេជោនាយករដ្ឋមន្ត្រីបានថ្លែងបន្ថែមថា សម្ដេចទន្ទឹងរង់ចាំក្នុងការទទួលការធ្វើទស្សនកិច្ចរបស់ឯកឧត្ដម នាយករដ្ឋមន្ត្រីឥណ្ឌាក្នុងការចូលរួមកិច្ចប្រជុំ កំពូលនៅក្នុងខែវិច្ឆិកា ឆ្នាំ២០២២ខាងមុខនេះ៕
ដោយ ជឹម ណារី
