សេអ៊ូល៖ ក្រសួងការបរទេសកូរ៉េខាងជើង នៅថ្ងៃអាទិត្យនេះ បានរិះគន់ ការអត្ថាធិប្បាយរបស់អគ្គលេខាធិការអង្គការសហប្រជាជាតិ នាពេលថ្មីៗនេះ លើការគាំទ្ររបស់លោក ចំពោះការរំសាយអាវុធនុយក្លេអ៊ែរទាំងស្រុងរបស់កូរ៉េខាងជើង។ នេះបើយោងតាមការចេញផ្សាយដោយសារព័ត៌មាន Reuters នៅថ្ងៃទី១៥ ខែសីហា ឆ្នាំ២០២២។
ទីភ្នាក់ងារសារព័ត៌មានរដ្ឋកូរ៉េខាងជើង KCNA បានចេញសេចក្តីថ្លែងការណ៍មួយពីក្រសួងការបរទេស បន្ទាប់ពីប្រធានអង្គការសហប្រជាជាតិ លោក Antonio Guterres កាលពីថ្ងៃសុក្រ បាននិយាយថា លោកគាំទ្រយ៉ាងពេញទំហឹង ចំពោះកិច្ចខិតខំប្រឹងប្រែងក្នុងការលុបបំបាត់នុយក្លេអ៊ែរទាំងស្រុងរបស់កូរ៉េខាងជើង នៅពេលដែលលោកបានជួបជាមួយប្រធានាធិបតីកូរ៉េខាងត្បូង លោក Yoon Suk-yeol។
លោក Gyong អនុរដ្ឋមន្ត្រីទទួលបន្ទុកអង្គការអន្តរជាតិ នៃក្រសួងការបរទេសកូរ៉េខាងជើង បាននិយាយនៅក្នុងសេចក្តីថ្លែងការណ៍មួយថា«ខ្ញុំអាចសម្តែងការសោកស្តាយយ៉ាងខ្លាំង ចំពោះការលើកឡើងរបស់អគ្គលេខាធិការអង្គការសហប្រជាជាតិ ដែលមានភាពលំអៀង និងអយុត្តិធម៌ទាំងស្រុង ហើយប្រឆាំងនឹងកាតព្វកិច្ចនៃកាតព្វកិច្ចរបស់គាត់ ដែលបានបញ្ជាក់នៅក្នុងធម្មនុញ្ញអង្គការសហប្រជាជាតិ ទាក់ទងនឹងបញ្ហាឧបទ្វីបកូរ៉េ»។
លោក គីម បានបន្ថែមថា អគ្គលេខាធិការអង្គការសហប្រជាជាតិ មិនគួរស្នើសុំ ឬទទួលបញ្ជាពីរដ្ឋាភិបាលនៃប្រទេសជាក់លាក់ណាមួយឡើយ ប៉ុន្តែត្រូវចៀសវាងទង្វើណាមួយដែលអាចធ្វើឲ្យខូចមុខតំណែងជាមន្ត្រីអន្តរជាតិ ដែលទទួលខុសត្រូវ ចំពោះអង្គការសហប្រជាជាតិតែប៉ុណ្ណោះ។
មេដឹកនាំកូរ៉េខាងជើងរូបនេះ បានសង្កត់ធ្ងន់ថា«ការរំសាយអាវុធនុយក្លេអ៊ែរពេញលេញ ដែលអាចផ្ទៀងផ្ទាត់បាន និងមិនអាចត្រឡប់វិញបាន»របស់កូរ៉េខាងជើង (CVID) គឺជា «ការរំលោភលើអធិបតេយ្យភាពរបស់កូរ៉េខាងជើង» ដោយសំដៅទៅលើប្រទេសកូរ៉េខាងជើង ដោយអក្សរកាត់នៃឈ្មោះផ្លូវការរបស់ខ្លួនគឺ សាធារណរដ្ឋប្រជាធិបតេយ្យប្រជាមានិតកូរ៉េ។
លោក គីម បានគូសបញ្ជាក់ថា«វាជាការទាមទារឱ្យមានការរំសាយអាវុធឯកតោភាគី ហើយអគ្គលេខាធិការ Guterres ប្រហែលជាដឹងយ៉ាងច្បាស់ថា កូរ៉េខាងជើង បានច្រានចោលទាំងស្រុងដោយគ្មានការអត់ឱន»ដោយបន្ថែមថា លោក Guterres គួរតែប្រុងប្រយ័ត្ននៅពេលនិយាយពាក្យសម្តីដ៏គ្រោះថ្នាក់ ចំពេលមានស្ថានភាពធ្ងន់ធ្ងរបំផុតលើឧបទ្វីបកូរ៉េ។
គួរបញ្ជាក់ថា ប្រទេសកូរ៉េខាងជើង បានបាញ់សាកល្បងមីស៊ីលជាច្រើននៅក្នុងឆ្នាំនេះ ហើយមន្ត្រីនៅទីក្រុងសេអ៊ូល និងវ៉ាស៊ីនតោន បាននិយាយថា ក្រុងព្យុងយ៉ាង ហាក់ដូចជាកំពុងរៀបចំ សាកល្បងអាវុធនុយក្លេអ៊ែរជាលើកដំបូង ចាប់តាំងពីឆ្នាំ ២០១៧ ចំពេលមានការជាប់គាំងកិច្ចពិភាក្សាស្តីពីការលុបបំបាត់អាវុធនុយក្លេអ៊ែរ៕
ប្រភព៖ Reuters
