អន្តរជាតិ៖ សហរដ្ឋអាមេរិក កំពុងត្រៀមខ្លួនជាស្រេចនូវជំនួយយោធាបន្ថែមប្រហែល ៨០០ លានដុល្លារដល់អ៊ុយក្រែន ហើយអាចប្រកាសផែនការនេះឱ្យបានឆាប់នៅថ្ងៃសុក្រនេះ នេះបើតាមប្រភពពីមន្រ្តីចំនួនបីរូប ដែលដឹងពីបញ្ហានេះបានប្រាប់ទីភ្នាក់ងារសារព័ត៌មានរ៉យទ័រ។ នេះបើយោងតាមការចេញផ្សាយដោយសារព័ត៌មាន AL JAZEERA , REUTERS នៅថ្ងៃទី១៩ ខែសីហា ឆ្នាំ២០២២។
ប្រភពបានប្រាប់រ៉យទ័រថា ប្រធានាធិបតីអាមេរិកលោក ចូ បៃដិន នឹងអនុញ្ញាតជំនួយដោយប្រើប្រាស់អាជ្ញាធរដកប្រធានាធិបតីរបស់លោក ដែលអនុញ្ញាតឱ្យប្រធានាធិបតីអាចយល់ព្រមលើការផ្ទេរអាវុធលើសពីស្តុករបស់សហរដ្ឋអាមេរិក។
ប្រភពដែលនិយាយក្នុងលក្ខខណ្ឌមិនបញ្ចេញឈ្មោះបាននិយាយថាការប្រកាសអាចធ្លាក់ចូលក្នុងសប្តាហ៍ក្រោយ ហើយបានព្រមានថាកញ្ចប់សព្វាវុធអាចផ្លាស់ប្តូរតម្លៃមុនពេលត្រូវបានប្រកាស។ សេតវិមានបានបដិសេធមិនធ្វើអត្ថាធិប្បាយទេ។
ទីក្រុងវ៉ាស៊ីនតោន បានបញ្ជូន ជំនួយផ្នែកសន្តិសុខរាប់ពាន់លានដុល្លារ ទៅកាន់ទីក្រុងគៀវ ជាមួយនឹងសព្វាវុធរួមទាំងប្រព័ន្ធរ៉ុក្កែតកាំភ្លើងធំចល័តខ្ពស់ ( HIMARS ) កាំភ្លើងត្បាល់ និងគ្រាប់កាំភ្លើងធំ ប្រព័ន្ធមីស៊ីលJavelinប្រឆាំងរថក្រោះ ,គ្រឿងផ្ទុះ និងឧបករណ៍កម្ទេចផងដែរ។
គួរបញ្ជាក់ថា ចាប់តាំងពីកងទ័ពរុស្ស៊ីបានឈ្លានពានអ៊ុយក្រែនក្នុងខែកុម្ភៈ នៅក្នុងអ្វីដែលប្រធានាធិបតីរុស្ស៊ីលោក វ្ល៉ាឌីមៀ ពូទីន ហៅថា «ប្រតិបត្តិការយោធាពិសេស»ជម្លោះបានឈានចូលដល់សង្រ្គាមនៃការវាយប្រយុទ្ធគ្នាជាចម្បងនៅភាគខាងកើត និងខាងត្បូងនៃអ៊ុយក្រែន៕
ប្រភព៖ AL JAZEERA , REUTERS
