អន្តរជាតិ៖ ប្រធានាធិបតីអាមេរិក លោក ចូ បៃដិន បាននិយាយថា លោកបានប្រាប់លោក ស៊ី ជីនពីង ប្រធានាធិបតីចិនថា វានឹងក្លាយជា«កំហុសដ៏ធំបំផុត»ក្នុងការបំពានលើការដាក់ទណ្ឌកម្មប្រឆាំងនឹងរុស្ស៊ី បន្ទាប់ពីការលុកលុយចូលអ៊ុយក្រែន។
ប្រធានាធិបតីអាមេរិកបាននិយាយថា លោកបាននិយាយជាមួយលោក ស៊ី បន្ទាប់ពីមេដឹកនាំរបស់ប្រទេសចិន បានជួបជាមួយប្រធានាធិបតីរុស្ស៊ីលោក វ៉្លាឌីមៀ ពូទីន ក្នុងអំឡុងពេលកីឡាអូឡាំពិករដូវរងាក្នុងខែកុម្ភៈ។ នេះបើយោងតាមការចេញផ្សាយដោយសារព័ត៌មាន Al Jazeera នៅថ្ងៃទី២០ ខែកញ្ញា ឆ្នាំ២០២២។
លោក បៃដិន បានធ្វើការអត្ថាធិប្បាយនៅក្នុងបទសម្ភាសន៍ជាមួយទូរទស្សន៍អាមេរិក CBS ដែលចេញផ្សាយកាលពីថ្ងៃអាទិត្យថា«ខ្ញុំបាននិយាយថា៖ «ប្រសិនបើអ្នកគិតថាជនជាតិអាមេរិក និងអ្នកផ្សេងទៀតនឹងបន្តវិនិយោគនៅក្នុងប្រទេសចិន ដោយផ្អែកលើការរំលោភលើទណ្ឌកម្ម ដែលត្រូវបានដាក់លើប្រទេសរុស្ស៊ី ខ្ញុំគិតថាអ្នកកំពុងធ្វើកំហុសដ៏ធំមួយ។ ប៉ុន្តែនោះជាការសម្រេចចិត្តរបស់អ្នកក្នុងការធ្វើ»។
.jpeg?1663647198)
លោក បៃដិន បានកត់សម្គាល់ថា ការអំពាវនាវនេះគឺ«មិនគំរាមកំហែង»ប្រធានាធិបតីចិន ប៉ុន្តែដើម្បីព្រមានអំពីផលវិបាកនៃការមិនអើពើនឹងទណ្ឌកម្មរបស់លោកខាងលិច។ ក្នុងនោះផងដែរ លោក បៃដិន បាននិយាយអំពីប្រទេសចិនថា៖ «រហូតមកដល់ពេលនេះ មិនមានការបង្ហាញថា ពួកគេបានដាក់អាវុធឬរបស់ផ្សេងទៀតដែលរុស្ស៊ីចង់បាននោះទេ»។
ជាមួយគ្នានេះ អ្នកវិភាគបាននិយាយថា ការពឹងផ្អែកយ៉ាងជ្រាលជ្រៅរបស់ចិនលើពាណិជ្ជកម្មជាមួយលោកខាងលិច មានន័យថា ទីក្រុងប៉េកាំង នឹងមិនចង់ធ្វើអ្វីដែលធ្វើឱ្យប៉ះពាល់ដល់សេដ្ឋកិច្ចរបស់ខ្លួនឡើយ។
គួរបញ្ជាក់ថា ទំនាក់ទំនងរបស់លោកពូទីន ជាមួយលោកខាងលិច នៅតែបន្តរអាក់រអួល ជុំវិញសង្គ្រាមរបស់លោកលើអ៊ុយក្រែន។ បន្ទាប់ពីវិមានក្រឹមឡាំង បានបញ្ជូនកងទ័ពនៅថ្ងៃទី២៤ ខែកុម្ភៈ ,លោកខាងលិច បានណែនាំការដាក់ទណ្ឌកម្មដែលមិនធ្លាប់មានពីមុនមក ប្រឆាំងនឹងទីក្រុងម៉ូស្គូ។
បន្ថែមពីនេះ ចិនបានបោះចោលរុស្ស៊ីនូវខ្សែសង្វាក់សេដ្ឋកិច្ច ចាប់តាំងពីការលុកលុយមក ប៉ុន្តែទង្វើបែបនេះ បានផ្តល់ផលប្រយោជន៍ដល់ទីក្រុងប៉េកាំងវិញផងដែរ។ ប្រទេសចិនបានកំណត់ទីតាំងខ្លួនឯងជាទីផ្សារជំនួសសម្រាប់ទំនិញរុស្ស៊ី និងជាអតិថិជនដ៏សំខាន់សម្រាប់ប្រេងឥន្ធនៈរុស្ស៊ីដែលមានតម្លៃថោក។
លើសពីនេះទៅទៀត លោកពូទីនកាលពីសប្តាហ៍មុន បានសម្តែងការដឹងគុណចំពោះលោកស៊ី សម្រាប់ «ជំហរមានតុល្យភាពនៃមិត្តចិនរបស់យើងទាក់ទងនឹងវិបត្តិអ៊ុយក្រែន»៕
ប្រភព៖ Al Jazeera
