អាមេរិក៖ ប្រធានាធិបតីសហរដ្ឋអាមេរិក លោក ចូ បៃដិន បានព្រមានថា ហានិភ័យនៃ «អាវុធនុយក្លេអ៊ែរ» គឺមានកម្រិតខ្ពស់បំផុត ចាប់តាំងពីវិបត្តិមីស៊ីលគុយបាក្នុងឆ្នាំ១៩៦២ ខណៈដែលទីក្រុងមូស្គូ និយាយដោយបើកចំហ អំពីលទ្ធភាពនៃការប្រើប្រាស់អាវុធនុយក្លេអ៊ែរយុទ្ធសាស្ត្រ ក្នុងការឈ្លានពានអ៊ុយក្រែន។ នេះបើយោងតាមការចេញផ្សាយដោយសារព័ត៌មាន BBC នៅថ្ងៃទី០៧ ខែតុលា ឆ្នាំ២០២២។
លោក បៃដិន បាននិយាយថា ប្រធានាធិបតីរុស្ស៊ីលោក វ្ល៉ាឌីមៀ ពូទីន «មិននិយាយលេងទេ» នៅពេលគាត់និយាយអំពីការប្រើប្រាស់អាវុធនុយក្លេអ៊ែរយុទ្ធសាស្ត្រ បន្ទាប់ពីទទួលរងនូវវិបត្តិនៅក្នុងប្រទេសអ៊ុយក្រែន។ លោកបៃដិន បានបន្ថែមថា សហរដ្ឋអាមេរិក កំពុងតែព្យាយាមស្វែងរកផ្លូវរបស់លោក ពូទីន ចេញពីសង្រ្គាម។
កន្លងមក សហរដ្ឋអាមេរិក និងសហភាពអឺរ៉ុប ធ្លាប់បាននិយាយថា ការវាយប្រហារនុយក្លេអ៊ែររបស់លោក ពូទីន គួរតែត្រូវបានយកចិត្តទុកដាក់យ៉ាងខ្លាំង។ អស់ជាច្រើនខែមកនេះ មន្ត្រីអាមេរិកបានព្រមានថា រុស្ស៊ីអាចងាកទៅរកការប្រើប្រាស់អាវុធប្រល័យលោក ប្រសិនបើខ្លួនទទួលរងការបរាជ័យនៅលើសមរភូមិ។ យ៉ាងណាក៏ដោយ ទីប្រឹក្សាសន្តិសុខជាតិអាមេរិក លោក Jake Sullivan កាលពីសប្តាហ៍មុន បាននិយាយថា ទោះបីជាទីក្រុងមូស្គូ មានការណែនាំអំពីនុយក្លេអ៊ែរ ក៏ដោយ ក៏សហរដ្ឋអាមេរិក មិនបានឃើញសញ្ញាណាមួយ ដែលបង្ហាញថា រុស្ស៊ីកំពុងត្រៀមប្រើប្រាស់អាវុធនុយក្លេអ៊ែ ក្នុងពេលឆាប់ៗនេះដែរ។
លោកប្រធានាធិបតី បៃដិន បាននិយាយថា មូលហេតុដែលមេដឹកនាំរុស្ស៊ីមិននិយាយលេងសើច នៅពេលដែលគាត់និយាយអំពីការប្រើប្រាស់អាវុធនុយក្លេអ៊ែរ អាវុធជីវសាស្ត្រ ឬគីមី - «ដោយសារតែយោធារបស់គាត់ អ្នកអាចនិយាយបានថា ដំណើរការមិនសូវល្អ»។ លោក បៃដិន បានប្រាប់អ្នកប្រជាធិបតេយ្យថា «ជាលើកដំបូងចាប់តាំងពីវិបត្តិមីស៊ីលគុយបា ពួកយើងមានការគំរាមកំហែងដោយផ្ទាល់ ចំពោះការប្រើប្រាស់អាវុធនុយក្លេអ៊ែរ ប្រសិនបើការពិតនៅតែបន្តដើរលើផ្លូវដែលពួកគេនឹងទៅ»។ កក្រើកនៅអឺរ៉ុបខាងកើត។ «យើងមិនបានប្រឈមមុខ នឹងការរំពឹងទុកនៃសង្គ្រាមហាម៉ាគេដូនទេ ចាប់តាំងពីប្រធានាធិបតីអាមេរិក John F. Kennedy»។
ជាមួយគ្នានេះ អ៊ុយក្រែន បាននិងកំពុងដណ្ដើមយកទឹកដីដែលរុស្ស៊ីកាន់កាប់វិញក្នុងនោះរួមទាំងតំបន់ទាំងបួនដែលរុស្ស៊ីបានបញ្ចូលដោយខុសច្បាប់កាលពីពេលថ្មីៗនេះផងដែរ។
យ៉ាងណាក៏ដោយ មន្ត្រីអាមេរិក បានចង្អុលបង្ហាញម្តងហើយម្តងទៀត អំពីលទ្ធភាពនៃការវាយប្រហារបរមាណូពេញមួយសង្រ្គាម ក៏ដូចជាការប្រើប្រាស់អាវុធជីវសាស្ត្រ ឬគីមី។ ទោះបីជាទីក្រុងមូស្គូមិនបានបង្ហាញសញ្ញាថា ខ្លួនមានបំណងដាក់ពង្រាយសព្វាវុធបែបនេះក៏ដោយ ប្រធានាធិបតីរុស្ស៊ីលោក វ្ល៉ាឌីមៀ ពូទីន បាននិយាយនៅក្នុងសុន្ទរកថានាពេលថ្មីៗនេះថា ប្រទេសរបស់លោកមាន«មធ្យោបាយនៃការបំផ្លិចបំផ្លាញ» ហើយថាលោកនឹងមិនស្ទាក់ស្ទើរក្នុងការប្រើអាវុធទាំងនោះ ដើម្បីការពារទឹកដីរុស្ស៊ីឡើយ។ លោកបាន បន្ថែមថា៖ «វាមិនមែនជាការនិយាយកុហកនោះទេ»។
គួរបញ្ជាក់ថា វិបត្តិមីស៊ីលគុយបាឆ្នាំ ១៩៦២ បានផ្ទុះឡើង បន្ទាប់ពីសហភាពសូវៀត បានដាក់ទីតាំងអាវុធនុយក្លេអ៊ែរនៅក្នុងប្រទេសគុយបា ជាការសងសឹកចំពោះទង្វើស្រដៀងគ្នារបស់ទីក្រុងវ៉ាស៊ីនតោនក្នុងប្រទេសទួរគី៕
ប្រភព៖ BBC
