ក្រុងគៀវ៖ យន្តហោះគ្មានមនុស្សបើក kamikaze ដែលធ្វើការហោះហើរដោយរុស្ស៊ី បានវាយប្រហារទីក្រុងគៀវ នៅព្រឹកថ្ងៃចន្ទ (ទី១៧ ខែតុលា), ប្រធានាធិបតីអ៊ុយក្រែន បាននិយាយថា ដោយពណ៌នាអំពីការវាយប្រហារនេះថាជាទង្វើនៃការអស់សង្ឃឹមរបស់រុស្ស៊ីជិតប្រាំបីខែចូលទៅក្នុងសង្រ្គាម ដែលបានឆក់យកជីវិតមនុស្សរាប់ពាន់នាក់។ នេះបើយោងតាមការចេញផ្សាយដោយសារព័ត៌មាន CNA នៅថ្ងៃទី១៧ ខែតុលា ឆ្នាំ២០២២។
ស៊ីរ៉ែនវាយឆ្មក់តាមអាកាសបានបន្លឺឡើងក្នុងទីក្រុងគៀវ ភ្លាមៗមុនការផ្ទុះលើកដំបូងនៅម៉ោងប្រហែល ៦និង៣៥នាទីព្រឹក បន្ទាប់មកដោយសំឡេងស៊ីរ៉ែននៅទូទាំងប្រទេសភាគច្រើន។ ប្រធានបុគ្គលិករបស់ប្រធានាធិបតី លោក Andriy Yermak បាននិយាយនៅលើប្រព័ន្ធផ្សព្វផ្សាយសង្គមថា «រដ្ឋធានីត្រូវបានវាយប្រហារដោយយន្តហោះគ្មានមនុស្សបើក kamikaze» ។ លោក Andriy Yermak បាននិយាយថា «យើងត្រូវការប្រព័ន្ធការពារអាកាសបន្ថែមទៀត ហើយឱ្យបានឆាប់តាមដែលអាចធ្វើទៅបាន។ អាវុធបន្ថែមទៀតដើម្បីការពារមេឃ និងបំផ្លាញសត្រូវ»។
គួរបញ្ជាក់ថា ការវាយប្រហារនេះកើតឡើងយ៉ាងពិតប្រាកដមួយសប្តាហ៍ បន្ទាប់ពីរុស្ស៊ីបានបញ្ចេញការវាយប្រហារដោយមីស៊ីលដ៏ធំមកលើរដ្ឋធានី និងទីក្រុងនានារបស់អ៊ុយក្រែននៅទូទាំងប្រទេស។
អភិបាលក្រុង គៀវ លោក Vitali Klitschko បាននិយាយថា ការវាយប្រហារដោយយន្តហោះគ្មានមនុស្សបើក បានបង្កឱ្យមានអគ្គីភ័យ និងខូចខាតអគារជាច្រើន ហើយបានព្រមានអ្នកស្រុកឱ្យរកទីជ្រកកោន។
ប្រធានាធិបតីអ៊ុយក្រែនលោក Volodymyr Zelenskyy កាលពីសប្តាហ៍មុនបាននិយាយថា យន្តហោះគ្មានមនុស្សបើករបស់អ៊ីរ៉ង់ ត្រូវបានប្រើប្រាស់ក្នុងការវាយប្រហាររបស់រុស្ស៊ីលើហេដ្ឋារចនាសម្ព័ន្ធថាមពលនៅក្នុងទីក្រុងជាច្រើនរបស់អ៊ុយក្រែន ទោះបីជាទីក្រុង តេហេរ៉ង់ បដិសេធការផ្គត់ផ្គង់អាវុធដល់រុស្ស៊ីសម្រាប់សង្គ្រាមក៏ដោយ។
.jpeg?1665995969)
បន្ថែមពីនេះ កាលពីថ្ងៃទី១០ ខែតុលា មីស៊ីលរបស់រុស្ស៊ី បានធ្លាក់មកលើទីក្រុង គៀវ និងទីក្រុងដទៃទៀត ក្នុងការវាយប្រហារដ៏ធំបំផុតក្នុងរយៈពេលជាច្រើនខែ។ ការវាយប្រហារនេះបានសម្លាប់មនុស្សយ៉ាងហោចណាស់ ១៩ នាក់ និង ១០៥ នាក់ផ្សេងទៀតរងរបួស និងបង្កឱ្យមានការថ្កោលទោសជាអន្តរជាតិ៕
ប្រភព៖ CNA
