ខេត្តកណ្តាល ៖ ជនសង្ស័យចំនួន២នាក់ ណាត់គ្នាមកកន្លែងស្ងាត់ កំពុងតែធ្វើសកម្មភាព ជួញដូរថ្នាំញៀន ត្រូវបានសមត្ថកិច្ចស្រុកកៀនស្វាយ មកទាន់ចាប់ឃាត់ខ្លួនបានទាំង២នាក់ ពាក់ព័ន្ធករណីជួញដូរនិងប្រើប្រាស់ ដោយខុសច្បាប់នូវសារធាតុញៀន (ម៉ាទឹកកក) ។

ប្រតិបត្តិការនេះបានធ្វើឡើងនៅវេលាម៉ោង ៦និង ៣០នាទី​យប់ ថ្ងៃទី៥ ខែធ្នូ​ឆ្នាំ២០២៣ នោចំណុចភូមិកំពង់ស្វាយ ឃុំកំពង់ស្វាយ ស្រុកកៀនស្វាយ ខេត្តកណ្តាល។

សមត្ថកិច្ចបានឲ្យដឹងថា ជនសង្ស័យដែលឃាត់ខ្លួនបានរួមមាន ៖

១- ឈ្មោះ ប៉ែន សុវណ្ណារ៉ូ ភេទប្រុសអាយុ២៨ ឆ្នាំជនជាតិខ្មែរ មុខរបរ បើកបរ មានទីលំនៅភូមិកំពង់ស្វាយ ឃុំកំពង់ស្វាយ ស្រុកកៀនស្វាយ ខេត្តកណ្តាល(ជួញដូរ)។

២- ឈ្មោះ ហួ សោភា ភេទប្រុសអាយុ៣៣ ឆ្នាំជនជាតិខ្មែរ មុខរបរ បើកបរ មានទីលំនៅ ភូមិរំចេក ឃុំត្នោត ស្រុកបាទី ខេត្តតាកែវ បច្ចុប្បន្នស្នាក់នៅបណ្តោះអាសន្ន ភូមិកំពង់ស្វាយ ឃុំកំពង់ស្វាយ ស្រុកកៀនស្វាយ ខេត្តកណ្តាល(ប្រើប្រាស់)។

ចំណែក វត្ថុតាងចាប់យករួមមាន៖ ម្សៅក្រាមពណ៌សថ្លាសង្ស័យសារធាតុញៀន(ម៉ាទឹកកក)ចំនួន០២កញ្ចប់

(ធំ០១ តូច០១កញ្ចប់) , ទូរស័ព្ទដៃចំនួន០២គ្រឿង( ម៉ាក Oppo០១ Sumsung០១), ជញ្ជីងសម្រាប់ថ្លឹងថ្នាំញៀនចំនួន០១ និងសម្ភារៈវេចខ្ចប់និងប្រើប្រាស់ថ្នាំញៀនមួយចំនួន។

សមត្ថកិច្ចបានឲ្យដឹងថា មុននឹងឈានដល់ការបង្ក្រាបខាងលើ កម្លាំងប៉ុស្តិ៍នរគបាលរដ្ឋបាលកំពង់ស្វាយ បានសហការជាមួយកម្លាំងជំនាញប្រឆាំងបទល្មើសគ្រឿងញៀនស្រុក ធ្វើការល្បាតគោលដៅងាយរងគ្រោះ ក៏ប្រទះឃើញជនសង្ស័យ០២នាក់ ១/ឈ្មោះ ប៉ែន សុវណ្ណារ៉ូ ២ /ឈ្មោះ ហួ សោភា កំពុងឈរតាមផ្លូវលំ ស្ថិតនៅភូមិកំពង់ស្វាយ ឃុំកំពង់ស្វាយ ស្រុកកៀនស្វាយ ខេត្តកណ្តាល ដោយមានការសង្ស័យកម្លាំងសមត្ថកិច្ចបានឃាត់សួរនាំ ហើយឆែកឆេរ រកឃើញថ្នាំញៀនចំនួន០២កញ្ចប់(ធំ០១ តូច០១) និងនាំខ្លួនជនសង្ស័យទាំង០២នាក់ រួមនិងវត្ថុតាងយកមកប៉ុស្តិ៍នគរបាលរដ្ឋបាលកំពង់ស្វាយ ដើម្បីសួរនាំ ។

នៅចំពោះមុខសមត្ថកិច្ចជនសង្សយ័ ឈ្មោះ ប៉ែន សុវណ្ណារ៉ូ ភេទប្រុស បានសារភាពថា ថ្នាំញៀនចំនួន០២កញ្ចប់ខាងលើពិតជារបស់ពួកខ្លួនប្រាកដមែន ដោយខ្លួនបានទិញពីមនុស្សប្រុស ម្នាក់មិនស្គាល់ឈ្មោះ មិនស្គាល់ទីលំនៅ តំលៃ៨០០០០០រៀល( ប៉ែតសិបម៉ឺនរៀល) នៅម្តុំស្ពានដែកចំការដូង ខណ្ឌដង្កោ រាជធានីភ្នំពេញ តាមរយះទូរសព្ទ័...... ដើម្បីយកមកវេចខ្ចប់ជាកញ្ចប់តូចៗទុកលក់បន្ត ។

ចំណែកឈ្មោះ ហួ សោភា ភេទប្រុស បានសារភាពថា ខ្លួនទើបតែប្រើប្រាស់ថ្នាំញៀនជាមួយឈ្មោះ ប៉ែន សុវណ្ណារ៉ា អស់ចំនួន០១កញ្ចប់តូច ហើយឈ្មោះ ប៉ែន សុវណ្ណារ៉ា ធ្លាប់អោយថ្នាំញៀន(ម៉ាទឹកកក) ខ្លួនចំនួន០៦ដងមកហើយដើម្បីយកមកប្រើប្រាស់ខ្លួនឯង។

ក្រោយសួរនាំរួចជនសង្ស័យរួមទាំងវត្ថុតាងបានបញ្ជូនទៅអធិការដ្ឋាននគរបាលស្រុកកៀនស្វាយដើម្បីបន្តនិតិវិធី៕ អែល វិចិត្រ