រាជធានីភ្នំពេញ៖ បុរសម្នាក់ ជិះម៉ូតូត្រឡប់ទៅផ្ទះវិញ ត្រូវបានរថយន្តបុកផ្ដាច់ជីវិតភ្លាមៗយ៉ាងរន្ធត់ កាលពីវេលាម៉ោង៨យប់ ថ្ងៃទី១៩ ខែកុម្ភៈ ឆ្នាំ២០២៤ នៅតាមផ្លូវបេតុងវត្តអរុណវត្តី សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានពីបងប្អូនប្រជាពលរដ្ឋ បានអោយដឹងថា មុនពេលកើតហេតុ គេបានឃើញបុរសម្នាក់ ជិះម៉ូតូ HONDA Dream ពាក់ស្លាកលេខ ភ្នំពេញ 1CH-7653 តាមបណ្ដោយផ្លូវបេតុងមួយកន្លែង ក្នុងទិសដៅពីកើតមកលិច មកដល់ផ្លូវបំបែកជាបី ស្រាប់តែត្រូវរថយន្ដ សាំយ៉ុង ពាក់ស្លាកលេខ ភ្នំពេញ 2AE-3364 បុកគ្នាពេញទំហឹង បណ្ដាលឲ្យអ្នកជិះម៉ូតូបោកក្បាលស្លាប់នៅនឹងកន្លែងភ្លាមៗតែម្តង ទុកឲ្យសាច់ញាតិមកដល់មិនអាចទទួលយកបាន អុជធូបហៅព្រលឹងទៅផ្ទះ ។
ក្រោយកើតហេតុសមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ចុះមកធ្វើការវាស់វែង យករថយន្ដ និងម៉ូតូទៅរក្សាទុក រង់ចាំការដោះស្រាយនៅពេលក្រោយតាមច្បាប់ និងប្រគល់សពឲ្យសាច់ញាតិយកទៅធ្វើបុណ្យតាមប្រពៃណី ៕ Mrr Ka
